ශ්රී ලංකාවේ අතීතයේ සිදුවූ බරපතල මානව හිමිකම් උල්ලංඝනය කිරීම් සම්බන්ධයෙන් නීතිය ක්රියාත්මක කිරීමේ ක්රියාවලිය ප්රමාද වී ඇති බවත්, එය ඉදිරි ප්රගතිය පිළිබඳ සැක පහදවන බවත් මානව හිමිකම් නිරීක්ෂණ සංවිධානය (Human Rights Watch – HRW) සිය අලුත්ම වාර්තාව මගින් පෙන්වා දෙයි.
ජනාධිපති අනුර කුමාර දිසානායක මහතාගේ රජය යටතේ ලසන්ත වික්රමතුංග ඝාතනය, ප්රගීත් එක්නැලිගොඩ අතුරුදහන් කිරීම, එකොළොස් දෙනෙකු පැහැරගෙන යාම සහ 2019 පාස්කු ඉරිදා බෝම්බ ප්රහාරය සම්බන්ධ විමර්ශනවල යම් ප්රගතියක් ලබා තිබුණද, සත්ය වශයෙන්ම යුක්තිය ඉටුකිරීම සඳහා රජයේ කැපවීම ප්රමාණවත් නොවන බව පිටු 49කින් යුත් මෙම වාර්තාවේ සඳහන් වේ. ප්රංශ ආධාර සේවකයන් 17 දෙනෙකු සහ දෙමළ සිසුන් 5 දෙනෙකු ඝාතනය කිරීම වැනි ප්රකට සිදුවීම් සම්බන්ධයෙන් තවමත් නිසි පියවර ගෙන නොමැති බවත්, එක්සත් ජාතීන්ගේ මානව හිමිකම් මණ්ඩලය සහ ජාත්යන්තර ප්රජාව ශ්රී ලංකා රජයට මේ සම්බන්ධයෙන් අඛණ්ඩව බලපෑම් කළ යුතු බවත් HRW සංවිධානයේ එක්සත් ජාතීන්ගේ අධ්යක්ෂිකා ලුසී මැක්කර්නන් (Lucy McKernan) මහත්මිය අවධාරණය කරයි.
