මන්නාරම් ද්රෝණියේ ඇති තෙල් බැරල් බිලියන දෙකක් සහ ස්වභාවික වායු කියුබික් අඩි ට්රිලියන නවයක අතිවිශාල ප්රමාණය නිසි ලෙස ප්රයෝජනයට ගැනීමෙන් රටේ සමස්ත ණය බර ගෙවා දමා ශ්රී ලංකාව ආසියාවේ සංවර්ධිතම රාජ්යය බවට පත් කළ හැකි බව ජාතික ජන බලවේගයේ පොළොන්නරුව දිස්ත්රික් පාර්ලිමේන්තු මන්ත්රී සුනිල් රත්නසිරි මහතා ප්රකාශ කර තිබේ. පොළොන්නරුවේ පැවති ජන හමුවක් අමතමින් ඔහු පෙන්වා දුන්නේ මෙම සම්පත් ගවේෂණය සඳහා වර්ග කිලෝමීටර් 34,000ක භූමි ප්රමාණයක් ප්රධාන කොටස් හතරකට බෙදා දේශීය හා විදේශීය ආයෝජකයන්ට ලංසු කැඳවීමට රජය දැනටමත් පියවර ගෙන ඇති බවයි.
මීට අමතරව, වත්මන් රජය ගොවි ජනතාව වෙනුවෙන් ඉතිහාසයේ නොවූ විරූ සහන ප්රමාණයක් ලබා දී ඇති බව සඳහන් කළ මන්ත්රීවරයා, යල කන්නයේ වී මිලදී ගැනීම සහ ගොවි සුබසාධනය වෙනුවෙන් රුපියල් මිලියන 46,600ක මුදලක් පළමු වටයේදීම නිදහස් කර ඇති බවත්, වී අලෙවි මණ්ඩලය හරහා වී මිලදී ගැනීමට රුපියල් මිලියන 6,000ක් සහ පෞද්ගලික අංශයට සහන පොලියට ණය සඳහා මිලියන 10,000ක් වෙන් කර ඇති බවත් පැවසීය. එමෙන්ම, පොහොර සහනාධාරය සඳහා රුපියල් මිලියන 13,492ක් සහ කුඩා මෝල් හිමියන් දිරිමත් කිරීමට රුපියල් ලක්ෂ 250 බැගින් පොලී රහිත ණය ලබා දීමට කටයුතු කර ඇති බවද ඔහු වැඩිදුරටත් අවධාරණය කළේය
