අකුරණ තෙළඹුගහවත්ත ප්රදේශයෙන් හමු වූ කොරෝනා ආසාදිත රෝගීන් සමග සමීප කතා බහක්, මුණගැසීමක් හෝ කිසියම් ආකාරයක සසම්බන්ධතාවක් තිබූ සියලු දෙනා වහාම සෞඛ්ය අංශයේ නිලධාරින්ට දන්වන ලෙස අකුරණ සෞඛ්ය වෛද්ය නිලධාරි සංජීව කුරුඳුගහමඩ ප්රදේශයේ ජනතාවගෙන් ඉල්ලා සිටියි.
මේ සඳහා කිසිදු බියකින් තොරව ඉදිරිපත් වන ලෙසත් මෙම ප්රදේශයෙන් මෙම වසංගතය තුරන් කිරීම සඳහා මෙම ඉල්ලීම කරන බවත් සෞඛ්ය වෛද්ය නිලධාරිවරයා තව දුරටත් ප්රකාශ කර සිටී.
කටුපොත 61ක් ස්වයං නිරෝධායනයට !
මේ අතර කටුපොත ප්රදේශයෙන් හමුවූ කොරෝනා වයිරසය ආසාදිත කාන්තාව හා සමීපව සිටිමින් කැකුණගොල්ල ප්රාථමික බෙහෙත් ශාලාවෙන් ප්රතිකාර ගැනීමට ගිය පුද්ගලයන් 61 දෙනෙකු සම්බන්ධ තොරතුරු අද පෙරවරුව වනවිට අනාවරණය කරගෙන ඇති බව කුලියාපිටිය කොටිඨාසය බාර ජ්යෙෂ්ඨ පොලිස් අධිකාරි මහින්ද දිසානායක මහතා ප්රකාශ කළේය.
කොරෝනා ආසාදිත බවට හඳුනාගෙන සිටින කැකුණගොල්ල පදිංචි කාන්තාව පසුගිය 30 වන දින කැකුණගොල්ල ප්රාථමික බෙහෙත් ශාලාවෙන් උණ රෝගයට ප්රතිකාර ලබා ගැනීම සඳහා ගොස් ඇති අතර ඇය එම අවස්ථාවෙිදි පැය තුනකට ආසන්න කාලයක් රෝහල් පරිශ්රය තුළ ප්රතිකාර ගැනීමට පැමිණ සිටි අනෙකුත් රෝගීන් හා සමීපව හිඳ ඇති බව අනාවරණය වී තිබෙි . එසේ සිටි රෝගීන් සංඛ්යාව 125 ක් පමණ බවද වාර්තා වේ .
මෙම තොරතුරු අනාවරණය වීමෙන් පසුව පොලීසිය මගින් කළ දැනුම් දීමකට අනුව පුද්ගලයන් 61 දෙනෙකු කටුපොත පොලීසියට පැමිණ තම තොරතුරු ලබා දීමෙන් පසුව ඔවුන් වෛද්ය උපදෙස් අනුව ස්වයං නිරෝධායන කටයුතු සඳහා යොමු කළ බවද ජ්යෙෂ්ඨ පොලිස් අධිකාරි මහින්ද දිසානායක මහතා පැවසීය .
