වෙසක් පොහොය නිමිත්තෙන් ඉන්දියාවේ ලඩාක් ප්රාන්තය කේන්ද්ර කරගනිමින් සංවිධානය කර ඇති “ජාත්යන්තර බුද්ධ ශ්රී සර්වඥ ධාතු ප්රදර්ශනය” පසුගිය මැයි පළමු වැනිදා අති උත්කර්ෂවත් අන්දමින් ආරම්භ විය.
නවදිල්ලියේ ජාතික කෞතුකාගාරයේ තැන්පත් කර තිබූ මෙම පූජනීය සර්වඥ ධාතූන් වහන්සේලා, ඉන්දීය රජයේ විශේෂ ගුවන් යානයක් මගින් ලඩාක් ප්රාන්තයේ ලේ නුවර වෙත වැඩම කරනු ලැබීය. වසර 75 කට පසුව මෙලෙස ධාතූන් වහන්සේලා ලඩාක් ප්රාන්තයට වැඩම කර තිබීම විශේෂත්වයකි.
ඉන්දීය ස්වදේශ කටයුතු අමාත්ය අමිත් ෂා මහතාගේ ප්රධානත්වයෙන් ප්රදර්ශනය ආරම්භ වූ අතර, ඒ මහතා ප්රථමයෙන් ධාතූන් වහන්සේලා වන්දනා කර ආශිර්වාද ලබා ගත්තේය. ධාතු ප්රදර්ශනය නැරඹීම සඳහා ලඩාක් සහ අවට ප්රදේශවලින් දහස් සංඛ්යාත බෞද්ධ ජනතාවක් මෙන්ම සංචාරකයන් ද පැමිණෙමින් සිටින බව වාර්තා වේ.
මෙහිදී අදහස් දැක්වූ අමිත් ෂා මහතා අවධාරණය කළේ බුදුන් වහන්සේ දේශනා කළ කරුණාව, සාමය සහ අහිංසාව වර්තමාන ලෝකයට වෙන කවරදාටත් වඩා අදාළ වන බවයි. හිමාල කලාපයේ බෞද්ධ උරුමයන් ආරක්ෂා කිරීමටත්, ආධ්යාත්මික සංචාරක කර්මාන්තය ප්රවර්ධනය කිරීමටත් අග්රාමාත්ය නරේන්ද්ර මෝදි ප්රමුඛ රජය කැපවී සිටින බව ද ඔහු වැඩිදුරටත් පැවසීය.
