මෝසම් වැසි හේතුවෙන් ඉන්දියාවේ ප්රදේශ කිහිපයක හටගත් හදිසි ගංවතුර සහ නායයෑම්වලින් පුද්ගලයින් 19 දෙනෙකු ජීවිතක්ෂයට පත්ව ඇති බව බලධාරීන් සහ දේශීය මාධ්ය වාර්තා කරයි.
මියගිය අය අතරින් අට දෙනෙකු ඉන්දියාවේ ඊසානදිග නාගලන්ඩ් ප්රාන්තයෙන් වාර්තා වන අතර, සෙසු 11 දෙනා මියගොස් ඇත්තේ ජම්මු සහ කාශ්මීර කලාපයෙනි. නාගලන්ඩ්හි මොන් දිස්ත්රික්කයේ නායයෑමකින් තවත් 15 දෙනෙකු තුවාල ලබා ඇති අතර, අතුරුදහන් වූවන් සෙවීමේ සහ සහන කටයුතු තවමත් ක්රියාත්මක වෙමින් පවතී.
ජම්මු සහ කාශ්මීරයේ රාජෞරි ප්රදේශයේ හටගත් දැඩි ගංවතුර තත්ත්වය හේතුවෙන් පොදු සහ පෞද්ගලික දේපළ විශාල වශයෙන් විනාශ වී ඇති බව ජම්මු සහ කාශ්මීරයේ මහ ඇමති ඔමාර් අබ්දුල්ලා මහතා ප්රකාශ කළේය. හමුදා සහ හදිසි ආපදා සේවා නිලධාරීන් එක්ව ළමුන් පස් දෙනෙකු ඇතුළු 11 දෙනෙකු බේරා ගැනීමට කටයුතු කර ඇත.
ඉන්දීය කාලගුණ විද්යා දෙපාර්තමේන්තුව ජම්මු සහ කාශ්මීරයට ඉදිරි දින දෙක තුළ දැඩි වර්ෂාපතනයක් ලැබිය හැකි බවට අනතුරු අඟවා තිබේ. ආරක්ෂක පියවරක් ලෙස කාශ්මීරයේ වාර්ෂික අමරනාත් වන්දනා ගමන සහ වෛෂ්ණෝ දේවි දේවාල වන්දනාව තාවකාලිකව අත්හිටුවීමට ද බලධාරීන් පියවර ගෙන ඇත. කාලගුණ තත්ත්වය යහපත් වී මාර්ග ආරක්ෂිත බව ප්රකාශ කරන තෙක් මෙම වන්දනා කටයුතු නැවත ආරම්භ නොකරන බව ද නිවේදනය කර තිබේ.
ඉන්දියාවේ මෝසම් වැසි සමයේදී මෙවැනි ගංවතුර සහ ආපදා වාර්ෂිකව සිදුවන අතර, එම වැසි සමය ආරම්භ වන්නේ රටේ බොහෝ ප්රදේශවල පවතින දැඩි වියළි කාලගුණ තත්ත්වයකින් පසුවය.
