ශ්රී ලංකාව සහ ඉන්දියාව අතර පවතින දිගුකාලීන මිත්රත්වය හා ආරක්ෂක සහයෝගීතාව තවදුරටත් ශක්තිමත් කරමින්, ඉන්දීය රජය විසින් ඇමෙරිකානු ඩොලර් මිලියන 5ක වටිනාකමකින් යුත් ආරක්ෂක සහ වෛද්ය උපකරණ තොගයක් ශ්රී ලංකා යුද්ධ හමුදාව වෙත පරිත්යාග කර තිබේ. ඉන්දීය රජයේ ආධාරයක් වශයෙන් ලබාදුන් මෙම උපකරණ තොගය අකුරේගොඩ පිහිටි යුද්ධ හමුදා මූලස්ථානයේදී නිල වශයෙන් භාරදීම සිදු විය.
මෙම විශේෂ උපකරණ තොගය ශ්රී ලංකාවේ ඉන්දීය මහ කොමසාරිස් සන්තෝෂ් ජා මහතා විසින් ආරක්ෂක ලේකම් එයාර් වයිස් මාර්ෂල් සම්පත් තුයියාකොන්ත (විශ්රාමික) වෙත නිල වශයෙන් භාරදෙන ලදී. මෙම අවස්ථාවට ශ්රී ලංකා යුද්ධ හමුදාධිපති ලුතිනන් ජෙනරාල් ලසන්ත රොද්රිගෝ ඇතුළු ජ්යෙෂ්ඨ හමුදා නිලධාරීන් පිරිසක්ද එක්ව සිටියහ.
මෙහිදී අදහස් දැක්වූ ඉන්දීය මහ කොමසාරිස් සන්තෝෂ් ජා මහතා සඳහන් කළේ, මෙම පරිත්යාගය දෙරටේ සන්නද්ධ හමුදා අතර පවතින ශක්තිමත් සහ දිගුකාලීන සබඳතාවයේ තවත් සුවිශේෂී ප්රතිඵලයක් බවයි. පුහුණු අවස්ථා සහ මානුෂීය ආධාරවලින් ඔබ්බට ගොස් ආරක්ෂක හැකියාවන් වර්ධනය කිරීම, යටිතල පහසුකම් සංවර්ධනය සහ හමුදා උපකරණ සැපයීම දක්වා දෙරටේ ආරක්ෂක සහයෝගීතාව ව්යාප්ත වී ඇති බවද ඔහු පෙන්වා දුන්නේය. එමෙන්ම “සාගර් බන්ධු” මෙහෙයුම යටතේ දිට්වා සුළි කුණාටුවෙන් පීඩාවට පත් ශ්රී ලංකාවට ඉන්දියාව විසින් කඩිනමින් ලබාදුන් මානුෂීය සහයෝගයද මහ කොමසාරිස්වරයා මෙහිදී සිහිපත් කළේය.
ආරක්ෂක ලේකම් සම්පත් තුයියාකොන්ත මහතා ජනාධිපතිවරයා සහ ආරක්ෂක අමාත්යාංශය වෙනුවෙන් ඉන්දීය රජයට සිය කෘතඥතාව පළ කළේය. අභියෝගාත්මක අවස්ථාවන්හිදී, ස්වභාවික ආපදා, ආර්ථික ප්රතිසාධන ක්රියාවලීන්, හැකියාවන් සංවර්ධනය සහ ආරක්ෂක සහයෝගීතාව සම්බන්ධයෙන් ඉන්දියාව ශ්රී ලංකාවට විශ්වාසදායක හවුල්කරුවෙකු ලෙස අඛණ්ඩ සහයෝගය ලබාදී ඇති බවද ආරක්ෂක ලේකම්වරයා මෙහිදී වැඩිදුරටත් අවධාරණය කළේය.
