ඉන්දියාව සහ ඊශ්රායලය අතර ආරක්ෂක සහ යුධමය හවුල්කාරිත්වය තවදුරටත් ශක්තිමත් කරමින්, ලොව සුපතල ‘අයන් ඩෝම්’ (Iron Dome) ගුවන් ආරක්ෂක පද්ධතියට අයත් ‘තමීර්’ (Tamir) මිසයිල ඉන්දියාව තුළ නිෂ්පාදනය කිරීමට තීරණය කර තිබේ.
ඊශ්රායල රජයට අයත් ප්රමුඛ පෙළේ ආරක්ෂක සමාගමක් වන ‘රෆායෙල් ඇඩ්වාන්ස්ඩ් ඩිෆෙන්ස් සිස්ටම්ස්’ (Rafael Advanced Defense Systems) සමාගම විසින් මෙම මිසයිල ඉන්දියාව තුළ ඒකාබද්ධව නිෂ්පාදනය කිරීම සඳහා මේ වන විටත් ඉන්දීය ආරක්ෂක සමාගම් සමඟ සාකච්ඡා පවත්වමින් සිටින බව වාර්තා වේ.
මෙම ව්යාපෘතිය මගින් මිසයිල සඳහා වන ගෝලීය ඉල්ලුම සපුරාලීම, නිෂ්පාදන පිරිවැය අවම කරගැනීම සහ හදිසි ආරක්ෂක අවශ්යතාවන් පැන නගින විට අමතර සැපයුම් ක්ෂණිකව ලබා ගැනීමේ හැකියාව වැනි කරුණු රැසක් අපේක්ෂා කෙරේ.
මෙම පියවර ඉන්දීය අග්රාමාත්ය නරේන්ද්ර මෝදි මහතාගේ ‘මේක් ඉන් ඉන්ඩියා’ (Make in India) වැඩපිළිවෙළට විශාල ශක්තියක් වනු ඇති අතර, එය කලාපය තුළ ඉන්දියාවේ ආරක්ෂක ස්ථාපිතභාවය තවදුරටත් තහවුරු කරනු ඇත. ඊශ්රායලය සහ ඉන්දියාව අතර පවතින ‘විශේෂ උපායමාර්ගික හවුල්කාරිත්වය’ වඩාත් අර්ථවත් කරමින් මෙම ආරක්ෂක ගිවිසුම ක්රියාවට නැංවීමට නියමිතයි.
