ඉදිරි දින කිහිපය තුළ ඉන්දියාවේ දිල්ලි අගනුවර ඇතුළු උතුරුදිග ප්රාන්ත රැසක උෂ්ණත්වය සෙල්සියස් අංශක 45 දක්වා ඉහළ යා හැකි බවට ඉන්දීය කාලගුණ විද්යා දෙපාර්තමේන්තුව රතු නිවේදනයක් නිකුත් කර තිබේ. මැයි 22 දක්වා පවතිනු ඇතැයි අපේක්ෂිත මෙම දැඩි උණුසුම් කාලගුණික තත්ත්වය හෙවත් ‘උණුසුම් තරංග’ (Heat Waves) හේතුවෙන් ජන ජීවිතයට දැඩි බලපෑම් එල්ල වෙමින් පවතින අතර මෙය ඉතා අවදානම් සහගත තත්ත්වයක් ලෙස බලධාරීන් පෙන්වා දෙයි.
රාජස්ථාන්, උත්තර ප්රදේශ්, මධ්ය ප්රදේශ්, පන්ජාබ්, හර්යානා, චන්දිගාර් සහ චතිස්ගාර් යන ප්රාන්තවල මෙම තත්ත්වය වඩාත් දරුණු ලෙස ව්යාප්ත වනු ඇතැයි පුරෝකථනය කර ඇති අතර කොන්කන් සහ ගෝවා ප්රාන්තවලට ද මෙහි බලපෑම එල්ල වී ඇත. සාමාන්යයෙන් තැනිතලා ප්රදේශයක උපරිම උෂ්ණත්වය සෙල්සියස් අංශක 40 ඉක්මවා ගොස් එය සාමාන්ය මට්ටමට වඩා අංශක 4.5 කින් පමණ ඉහළ යන විට මෙලෙස උණුසුම් තරංග තත්ත්වයක් ප්රකාශයට පත් කෙරේ. දිල්ලියේ උෂ්ණත්වය ඉදිරි දින කිහිපයේදී තවත් අංශක 2-3 කින් පමණ ඉහළ යා හැකි බව වාර්තා වන අතර, වරින් වර ප්රබල සුළං තත්ත්වයක් ඇති වුවද පැහැදිලි අහස සහිත දිනවලදී හිරු රශ්මිය තවදුරටත් තීව්ර වනු ඇත.
කෙසේ වෙතත්, උතුරුදිග ප්රාන්ත මෙලෙස දැඩි උණුසුමකින් පීඩා විඳිද්දී, කේරළය සහ තමිල්නාඩුව වැනි දකුණුදිග ප්රාන්තවලට මෙන්ම ඊසානදිග ප්රදේශවලට ගිගුරුම් සහිත වැසි ඇති විය හැකි බව ද ඉන්දීය කාලගුණ අංශ වැඩිදුරටත් සඳහන් කරයි.
