ඇමෙරිකා එක්සත් ජනපදය සහ ඉරානය අතර පවතින සන්නද්ධ ගැටුම් තවදුරටත් උත්සන්න වෙමින් පවතින පසුබිමක, උපායමාර්ගිකව අතිශය වැදගත් හෝමුස් සමුද්ර සන්ධියේ (Strait of Hormuz) පාලනය නිල වශයෙන් තමන් සතු කරගැනීම සඳහා වන විශේෂ පනත් කෙටුම්පතක් ඉරාන පාර්ලිමේන්තුවට ඉදිරිපත් කර තිබේ.
පසුගිය පෙබරවාරි 28 වැනිදා ඇමෙරිකාව සහ ඊශ්රායලය එල්ල කළ ප්රහාරවලින් ඉරාන උත්තරීතර නායක අයතුල්ලා අලි කමේනි ඇතුළු ඉහළ පෙළේ නිලධාරීන් මියයාමෙන් පසු හටගත් යුදමය තත්ත්වයත් සමඟ මාස පහක පමණ කාලයකට පසු ඉරාන පාර්ලිමේන්තුව රැස්වූ පළමු අවස්ථාව මෙයයි. එහිදී ඉදිරිපත් වූ “හෝමුස් සමුද්ර සන්ධියේ සහ පර්සියානු ගල්ෆ් කලාපයේ ආරක්ෂාව සහ තිරසාර ප්රගතිය සඳහා වූ උපායමාර්ගික පියවර” නම් යෝජනාවලියට අනුව, ඇමෙරිකානු හෝ ඊශ්රායල ධජය සහිත නැව් සහ ඉරානයට සතුරු රටවල මිලිටරි යාත්රාවලට මෙම මුහුදු මාර්ගය තහනම් කිරීමට යෝජනා වී ඇත. එමෙන්ම, මෙම සන්ධිය හරහා යන අනෙකුත් නැව්වලින් ගාස්තු අය කිරීමට සහ භාණ්ඩවල වටිනාකමෙන් 20%ක් දක්වා රාජසන්තක කිරීමට ඉරානයට බලය පැවරෙන පරිදි නීති සකස් කිරීමට සැලසුම් කර තිබේ.
මේ අතර, පසුගිය සතිය පුරා ඇමෙරිකානු හමුදාව විසින් ඉරානයේ පළාත් 11කට අධික සංඛ්යාවකට ගුවන් ප්රහාර සිය ගණනක් එල්ල කර ඇති අතර ඉන් පුද්ගලයන් 20කට වැඩි පිරිසක් මියගොස් තිබේ. හෝමුස් සමුද්ර සන්ධිය අසල පිහිටි බන්ඩර් අබ්බාස් වරාය නගරය මෙම ප්රහාරවලින් දැඩි ලෙස පීඩාවට පත්ව ඇත. ඊට ප්රතිචාර වශයෙන් ඉරාන විප්ලවීය ආරක්ෂක බලකාය (IRGC) බහරේනය, කුවේටය සහ ජෝර්දානයේ පිහිටි ඇමෙරිකානු යුද කඳවුරුවලට සහ රේඩාර් පද්ධතිවලට මිසයිල ප්රහාර එල්ල කර ඇති අතර, කලාපීය යුදමය තත්ත්වය හේතුවෙන් ඉරාන රියාල් මුදල් ඒකකය ද ඉතිහාසයේ නොවූ විරූ ලෙස කඩා වැටෙමින් පවතින බව වාර්තා වේ.
