ඉරානය සහ ඇමෙරිකා එක්සත් ජනපදය අතර පවතින සාකච්ඡාවල කොටසක් ලෙස, හෝමූස් සමුද්ර සන්ධියේ (Strait of Hormuz) ඕමාන් රාජ්යයට අයත් මුහුදු තීරය හරහා ප්රහාරවලින් තොරව නෞකාවලට නිදහසේ යාත්රා කිරීමට ඉඩ ලබා දීමේ යෝජනාවක් ඉරානය විසින් ඉදිරිපත් කර ඇති බව ටෙහෙරාන් ආරංචි මාර්ග තහවුරු කරයි. මෙම යෝජනාව ක්රියාත්මක වීමට නම් දෙපාර්ශවය අතර නැවත ගැටුම් ඇති නොවන ආකාරයේ ස්ථාවර එකඟතාවයකට පැමිණිය යුතු බව ඉරානය අවධාරණය කර ඇත.
පසුගිය පෙබරවාරි 28 වනදා ආරම්භ වූ ඇමෙරිකා-ඊශ්රායල සහ ඉරාන යුද්ධය හේතුවෙන් ලෝකයේ තෙල් සහ ස්වභාවික වායු සැපයුමෙන් 20%ක් පමණ ගමන් කරන මෙම තීරණාත්මක මුහුදු මාර්ගය අවහිර වීම නිසා ගෝලීය බලශක්ති සැපයුමට මෙතෙක් වාර්තා වූ විශාලම බාධාව එල්ල විය. මේ වන විට නෞකා සිය ගණනක් සහ නාවිකයින් 20,000කට අධික පිරිසක් පර්සියානු බොක්ක තුළ සිරවී සිටින අතර, අප්රේල් 08 වනදා සිට ක්රියාත්මක වන සති දෙකක සටන් විරාමය හමුවේ මෙම ගැටලුවට විසඳුම් සෙවීමට රාජ්ය තාන්ත්රික මට්ටමින් සාකච්ඡා වෙමින් පවතී. ජනාධිපති ඩොනල්ඩ් ට්රම්ප් ද මෙම යුද්ධය අවසන් වීමට ආසන්න බව ප්රකාශ කර ඇති පසුබිමක, හෝමූස් සමුද්ර සන්ධියේ පාලනය පිළිබඳ එකඟතාවය ඉදිරි සාම ක්රියාවලියේ ප්රධානතම සාධකයක් වනු ඇත.
