ඉරානය සහ එක්සත් ජනපදය අතර දෙවැනි වටයේ සාම සාකච්ඡා අද (අප්රේල් 20) පාකිස්ථානයේ ඉස්ලාමාබාද් නුවරදී පැවැත්වීමට නියමිතව තිබුණද, දෙරට අතර පවතින දැඩි මතභේදකාරී තත්ත්වය හමුවේ එය අවිනිශ්චිත වී තිබේ. අමෙරිකානු ජනාධිපති ඩොනල්ඩ් ට්රම්ප් සිය නියෝජිත පිරිස පාකිස්ථානය බලා පිටත් කර හැරියද, ඉරානය මේ දක්වා එම සාකච්ඡාවලට සහභාගී වන බව නිල වශයෙන් ප්රකාශ කර නැත.
එක්සත් ජනපද උප ජනාධිපති ජේ.ඩී. වෑන්ස්ගේ (J.D. Vance) ප්රධානත්වයෙන් යුත් දූත පිරිසට ට්රම්ප්ගේ සමීප උපදේශකයින් වන ස්ටීව් විට්කොෆ් සහ ජැරඩ් කුෂ්නර් ඇතුළත් වේ. ඉරානයට ඉතා සාධාරණ ගනුදෙනුවක් තමන් පිරිනමන බව පවසා ඇති ජනාධිපති ට්රම්ප්, එය ප්රතික්ෂේප කළහොත් ඉරානයේ සෑම බලාගාරයක්ම සහ පාලමක්ම විනාශ කරන බවට දැඩි අනතුරු ඇඟවීමක් ද සිදු කර තිබේ.
අමෙරිකානු සම්බාධක පවතින තාක් කල් කිසිදු සාකච්ඡාවකට සහභාගී නොවන බව ඉරාන රාජ්ය මාධ්ය ප්රකාශ කර ඇත. මීට පෙර පැවති පැය 21ක පළමු සාකච්ඡා වටය ද ඉරානයේ න්යෂ්ටික වැඩසටහන සම්බන්ධයෙන් ඇති වූ එකඟ නොවීම් මත විසඳුමකින් තොරව අවසන් විය.
මෙම තත්ත්වය හමුවේ පාකිස්ථානයේ මැදිහත් වීමෙන් පැවැත්වීමට නියමිත දෙවැනි වටයේ සාකච්ඡා සාර්ථක වේද යන්න පිළිබඳව ජාත්යන්තර අවධානය යොමු වී පවතී.
