වොෂින්ටනය අනුගමනය කරන “යුද්ධය සහ සාකච්ඡා” යන ද්විත්ව උපායමාර්ගය මේ වන විට අවසන් අඩපණ වී ඇති බවත්, අමෙරිකානු ආක්රමණ වහාම නතර නොකළහොත් ඉරානය පූර්ණ පරිමාණයේ විනාශකාරී යුධ අවධියකට පිවිසීමට සම්පූර්ණයෙන්ම සූදානම් බවත් ඉරාන උත්තරීතර නායකයාගේ ජ්යෙෂ්ඨ හමුදා උපදේශක, මේජර් ජනරාල් මොහ්සෙන් රෙසායි ප්රකාශ කරයි.
ඉස්ලාමාබාද් අවබෝධතා ගිවිසුමේ (MoU) කොන්දේසි අමෙරිකාව ක්රමානුකූලව උල්ලංඝනය කිරීම දැඩි ලෙස හෙළා දකින ජනරාල් රෙසායි, අතීතයේදී ‘JCPOA’ න්යෂ්ටික ගිවිසුම අමෙරිකාව විසින් විනාශ කළ ආකාරයටම මෙම ගිවිසුම ද ඔවුන් හිතාමතාම කඩ කර ඇති බව පෙන්වා දෙයි. මෙම ගිවිසුම අමෙරිකාව භාවිතා කළේ ටෙහෙරානයට බලපෑම් කිරීමේ උපකරණයක් ලෙස පමණක් බවත්, කිසිවිටෙකත් එය ගෞරවයෙන් ක්රියාත්මක කිරීමට ඔවුන්ගේ අදහසක් නොතිබූ බවත් හෙතෙම අවධාරණය කරයි.
ගිවිසුම උල්ලංඝනය කරමින් අමෙරිකාව මේ වන විට ඉරානයේ ඛුසෙස්තාන්, බුෂෙහර්, හෝර්මොස්ගන් සහ සිස්තාන්-බලුචෙස්තාන් යන පළාත්වල රෝහල්, හමුදා කඳවුරු සහ ප්රධාන පාලම් වැනි සිවිල් යටිතල පහසුකම් ඉලක්ක කරමින් ප්රහාර එල්ල කරමින් සිටින බව ජනරාල් රෙසායි පැවසීය. මීට ප්රතිචාර වශයෙන් ඉරාන සන්නද්ධ හමුදා දැනටමත් දියත් කර ඇති දැඩි සහ අඛණ්ඩ ප්රහාර ඉදිරියේදී තවදුරටත් තීව්ර වනු ඇති බව ඔහු අනතුරු අඟවයි.
පසුගිය වසරේ පැවති දින 12ක යුද්ධයේදී කලාපීය යුද්ධයක් වැළැක්වීම සඳහා ඉරානය උපායමාර්ගික ඉවසීමක් ප්රදර්ශනය කරමින් කුවේට් සහ අසල්වැසි රටවල පිහිටි අමෙරිකානු කඳවුරු ඉලක්ක කිරීමෙන් වැළකී සිටි බව ඔහු සිහිපත් කළේය. එහෙත් සතුරා යළිත් සතුරුකම් ආරම්භ කිරීම නිසා මෙම ගැටුම තවදුරටත් පාලනය කළ නොහැකි තත්ත්වයට පත්ව ඇත. ලෝක තෙල් මිල පාලනය කිරීමේ අරමුණින් ලොව ප්රධාන බලශක්ති මාර්ගයක් වන හෝර්මුස් සමුද්ර සන්ධිය තම පාලනයට නතු කර ගැනීමට අමෙරිකාව දරන උත්සාහය ඉරානය, රුසියාව, චීනය හෝ යුරෝපය කිසිසේත්ම පිළි නොගන්නා බවත්, එය ලෝක ව්යසනයකට මුල පිරීමක් විය හැකි බවත් හෙතෙම වැඩිදුරටත් සඳහන් කළේය.
