ශ්රී ලංකා මුහුදු සීමාව ආසන්නයේ ජාත්යන්තර ජල තීරයේ ඉරාන නෞකා රැඳී සිටීම සම්බන්ධයෙන් කොළඹ පිහිටි ඇමරිකානු තානාපති කාර්යාලය විසින් ශ්රී ලංකා විදේශ අමාත්යාංශය වෙත නිල වශයෙන් දැනුම් දී තිබේ.
ඇමරිකාව සහ ඉරානය අතර පවතින යුදමය නොසන්සුන්තාවන් මධ්යයේ මතුව ඇති මෙම තත්ත්වය හමුවේ, ශ්රී ලංකාවේ මුහුදු සීමාවෙන් නාවික සැතපුම් 24කට වඩා ඔබ්බෙන් වූ ජාත්යන්තර මුහුදේ ඉරාන ධජය සහිත නෞකා මෙන්ම අනෙකුත් වාණිජ සහ භාණ්ඩ ප්රවාහන නෞකා 47ක් පමණ හඳුනාගෙන ඇති බව විදේශ අමාත්ය විජිත හේරත් මහතා කැබිනට් තීරණ දැනුම් දීමේ මාධ්ය හමුවේදී තහවුරු කළේය. අදාළ දැනුම්දීම ලැබුණු වගකිවයුතු මොහොතේ සිටම ආරක්ෂක සහ වරාය අමාත්යාංශ ඒ පිළිබඳව දැනුවත් කර ඇති අතර, මෙම කිසිදු නෞකාවක් ශ්රී ලංකාවේ දේශීය මුහුදු සීමාවට ඇතුළු වී නොමැති බවට නාවික හමුදාව දැඩි අවධානයෙන් පසුවන බව හෙතෙම වැඩිදුරටත් පෙන්වා දුන්නේය.
මෙම නෞකා කිසිවක් ශ්රී ලංකා රජයෙන් කිසිදු පහසුකමක් හෝ සහායක් ඉල්ලා නොමැති අතර, ශ්රී ලංකාව, තායිලන්තය, මැලේසියාව සහ ඉන්දුනීසියාව වැනි රටවලට ඔබ්බෙන් වූ ජාත්යන්තර මුහුදු සීමාවල වාණිජ නෞකා රැඳී සිටීම සාමාන්ය තත්ත්වයක් බව රජය පෙන්වා දෙයි. කෙසේ වෙතත්, කලාපීය ආරක්ෂාව සහ භූ දේශපාලනික උණුසුම්කාරී වාතාවරණය සලකා බනිමින්, ශ්රී ලංකා රජය මෙම නෞකා වල ගමන් මග පිළිබඳව අඛණ්ඩව විමසිල්ලෙන් පසුවනවා හැරෙන්නට වෙනත් කිසිදු මැදිහත්වීමක් සිදු කර නොමැති අතර, ඉදිරියේදී ද ආරක්ෂක අංශ මේ සම්බන්ධයෙන් දැඩි අවධානයෙන් කටයුතු කරනු ඇත.
