ඉස්ලාමීය රටවල පාලකයන් සිය සැබෑ සතුරා නිවැරදිව හඳුනාගෙන බටහිර ආසියාවේ සහ පර්සියානු ගල්ෆ් කලාපයේ ආරක්ෂාව වෙනුවෙන් එක්විය යුතු බවට ඉරානයේ උත්තරීතර නායක මොජ්ටාබා කමේනි විසින් සිදු කර ඇති දැඩි ප්රකාශයත් සමඟ මැදපෙරදිග කලාපීය දේශපාලන සමීකරණය තවත් උණුසුම් මුහුණුවරක් ගෙන තිබේ. “ඉස්ලාමීය එකමුතු සතිය” නිමිත්තෙන් විශේෂ පණිවිඩයක් නිකුත් කරමින් ඔහු සඳහන් කර ඇත්තේ, අමෙරිකා එක්සත් ජනපදය සහ ඊශ්රායලය යනු සමස්ත ඉස්ලාමීය ලෝකයේම පැවැත්මට තර්ජනයක් වන සදාකාලික සතුරන් වන බැවින්, මුස්ලිම් රටවල් අතර පවතින විවිධ වාර්ගික හා දේශපාලන වෙනස්කම් ඉවත දමා ඔවුන්ගේ කුමන්ත්රණ පරාජය කිරීමට එකතු විය යුතු බවයි.
පසුගිය පෙබරවාරි මාසයේදී අමෙරිකාව සහ ඊශ්රායලය එක්ව ඉරානයට එල්ල කළ ප්රහාරයෙන් පසු කලාපයේ හටගත් දැඩි නොසන්සුන්කාරී තත්ත්වය සහ පසුව ඇති කරගත් කරුණු 14කින් යුත් අවබෝධතා ගිවිසුම ද මේ වන විට අසාර්ථක වී ඇති පසුබිමක මෙම ප්රකාශය නිකුත් වීම විශේෂිතය. මුස්ලිම් සමාජයන් අතර භේද ඇති කරමින් ප්රබල ඉස්ලාමීය ශිෂ්ටාචාරයක් ගොඩනැගීමේ ප්රයත්නයන් මැඩපැවැත්වීමට වොෂින්ටනය සහ ටෙල් අවිව් පාලනයන් නිරන්තරයෙන් උත්සාහ කරන බව පෙන්වා දී ඇති කමේනි, ඉරාන වැසියන් අතරද කිසිදු අභ්යන්තර බෙදීමකට ඉඩ නොතබන ලෙස දැඩිව ඉල්ලා සිටියේය.
මෙම මතවාදී උණුසුම හමුවේ මැදපෙරදිග කලාපීය බල තුලනය තවත් තීව්ර වනු ඇති අතර, එය ඉදිරියේදී කලාපීය ආරක්ෂාවට මෙන්ම ගෝලීය බලශක්ති සැපයුම් දාමයන්ට ද සෘජුවම බලපෑම් එල්ල කළ හැකි සාධකයක් බව ජාත්යන්තර දේශපාලන විශ්ලේෂකයෝ පෙන්වා දෙති. රාජ්යතාන්ත්රික මට්ටමින් දෙපාර්ශ්වය අතර පවතින විශ්වාසය සම්පූර්ණයෙන්ම බිඳ වැටී ඇති මෙම මොහොතක, ඉස්ලාමීය ලෝකයේ නායකයන් ඉදිරියේදී ගන්නා ප්රතිපත්තිමය තීරණ මත මැදපෙරදිග අනාගත යුධ සහ සාම වාතාවරණය සම්පූර්ණයෙන්ම තීරණය වනු ඇත.
