ඉරාකය තුළ ක්රියාත්මක වන සියලුම ඉරාන හිතවාදී සන්නද්ධ කණ්ඩායම් එළඹෙන සැප්තැම්බර් 30 වනදාට පෙර සම්පූර්ණයෙන්ම නිරායුධ විය යුතු බවත්, නැතහොත් ඔවුන්ට එරෙහිව දැඩිව නීතිය ක්රියාත්මක කරන බවත් ඉරාක අගමැති අලි අල්-සයිදි (Ali al-Zaidi) මහතා නිවේදනය කර තිබේ. ඉරාක රජයේ මාධ්ය ප්රකාශක හයිඩර් අල්-අබුඩි (Haider al-Aboudi) මහතා විසින් පවත්වන ලද මාධ්ය සාකච්ඡාවකදී මේ බව නිල වශයෙන් ප්රකාශයට පත් කෙරිණි.
මෙම නිවේදනය නිකුත් කර ඇත්තේ අගමැති අලි අල්-සයිදි මහතා සිය ප්රථම නිල ඇමරිකානු සංචාරය සඳහා වොෂින්ටන් නුවර බලා පිටත්ව යාමට නියමිත පසුබිමකය. ඉරාකය තුළ ක්රියාත්මක වන සන්නද්ධ කණ්ඩායම් සතු ආයුධ රජය සතු කරගන්නා ලෙස ඇමරිකානු රජය විසින් බැග්ඩෑඩ් පාලනයට දිගින් දිගටම දැඩි බලපෑම් එල්ල කරමින් සිටී.
විශේෂයෙන්ම මෙම සැප්තැම්බර් 30 වනදා ඉලක්කය, අයිසිස් (ISIS) ත්රස්තවාදීන්ට එරෙහිව ඇමරිකාව ප්රමුඛ ජාත්යන්තර සන්ධානය ඉරානය තුළ ක්රියාත්මක කළ සිය මෙහෙයුම් නිල වශයෙන් අවසන් කරන දිනය සමඟ සමපාත වේ. “රාජ්ය රාමුවෙන් බැහැරව පවතින සියලුම ආයුධ සැප්තැම්බර් 30 න් පසු නීතිමය පියවරයන්ට යටත් කරනු ලබනවා” යැයි රජයේ ප්රකාශකයා අවධාරණය කළේය.
2003 වසරේ ඇමරිකානු ආක්රමණයෙන් සහ පසුව අයිසිස් සංවිධානයට එරෙහි සටනෙන් පසුව පසුගිය වසර 20කට අධික කාලයක් තිස්සේ මෙම ඉරාන හිතවාදී මිලීෂියා කණ්ඩායම් ඉරාකයේ බලය තහවුරු කරගෙන සිටිති. කෙසේ වෙතත්, නව අගමැතිවරයාගේ මෙම තීරණාත්මක පියවරත් සමඟ ඇතැම් ප්රමුඛ සන්නද්ධ කණ්ඩායම් මේ වන විටත් තම පාලන බල ප්රදේශ රජයේ ආරක්ෂක අංශ වෙත භාරදීම ආරම්භ කර ඇති බව වාර්තා වේ.
තොරතුරු උපුටා ගැනීම: Mario nawfal(X) ඇසුරින්
