2022 වසරේ අරගලකරුවන්ට පහරදීමේ සිද්ධිය සම්බන්ධයෙන් සැකකරුවන්ට ඇප නොදෙන ලෙස ඉල්ලමින් උද්ඝෝෂණය කිරීමේ චෝදනාව මත අත්අඩංගුවට ගෙන ඇප මත සිටින පාර්ලිමේන්තු මන්ත්රී ජගත් මනුවර්ණ, රතිඳු සේනාරත්න (රැට්ටා) ඇතුළු පිරිසට එරෙහි නඩුව අගෝස්තු 17 වනදා යළි කැඳවන ලෙස කොටුව මහේස්ත්රාත් පසන් අමරසේන මහතා අද (04) නියෝග කළේය.
නඩුව කැඳවූ අවස්ථාවේදී කොම්පඤ්ඤවීදිය පොලීසිය අධිකරණයට දන්වා සිටියේ මෙම නඩුවට අදාළ ගොනුව වැඩිදුර උපදෙස් සඳහා නීතිපතිවරයා වෙත යොමු කර ඇති බවයි. පසුගිය නඩු වාරයේදී අධිකරණය හමුවේ පෙනී නොසිටි පාර්ලිමේන්තු මන්ත්රී ජගත් මනුවර්ණ මහතාගේ වෛද්ය සහතිකය අද දින ඔහුගේ නීතිඥවරයා විසින් ඉදිරිපත් කරන ලදී.
සැකකරුවන් වෙනුවෙන් පෙනී සිටි නීතිඥවරුන් අධිකරණයට පෙන්වා දුන්නේ මෙය බොහෝ කලක් ගතවූ සිද්ධියක් බවත්, අරගලයට අදාළව පවරා තිබූ අනෙකුත් බොහෝ නඩු මේ වන විට අවසන් වී ඇති බැවින් සැකකරුවන් මෙම චෝදනාවලින් මුදා හරින ලෙසයි. කරුණු සලකා බැලූ මහේස්ත්රාත්වරයා, නීතිපතිවරයා වෙත යොමු කර ඇති ගොනුවට අදාළ යොමු අංකය අධිකරණයට ඉදිරිපත් කරන ලෙස පොලීසියට නියෝග කළේය.
මෙම සිද්ධිය සම්බන්ධයෙන් ඇප මත මුදා හැර සිටින රංගනවේදිනී දමිතා අබේරත්න, ලංකා ගුරු සංගමයේ සභාපති ජෝසප් ස්ටාලින්, ධම්මික මුණසිංහ, තැම්පිටියේ ඤාණානන්ද හිමි, තැම්පිටියේ සුගතානන්ද හිමි සහ සත්යවේල් පියතුමා ඇතුළු සැකකරුවන් අටදෙනෙකු අද දින විවෘත අධිකරණයේ පෙනී සිටියහ.
