නෙදර්ලන්ත තානාපති කාර්යාලය අද දින කොළඹ ජාවත්ත පොදුරාජ්ය මණ්ඩලීය යුද සුසාන භූමියේදී ශ්රී ලංකාවේ තැන්පත් කර ඇති යුද වින්දිතයින් සිහිපත් කරමින් විශේෂ අනුස්මරණ උත්සවයක් පවත්වා තිබේ. මෙහිදී වැඩබලන තානාපති අයිවන් රූට්ජෙන්ස් මහතා යුද ස්මාරකය සහ සොහොන් ගැබ් වෙත පුෂ්පෝපහාර දැක්වූ අතර මියගිය පිරිස සිහි කරමින් මිනිත්තු දෙකක නිශ්ශබ්දතාවයක් ද පවත්වන ලදී. දෙවන ලෝක යුධ සමයේ මියගිය නෙදර්ලන්ත ජාතිකයින් 36 දෙනෙකුගේ සිරුරු කොළඹ, මහනුවර සහ ත්රිකුණාමලය යන නගරවල පිහිටි සුසාන භූමිවල තැන්පත් කර ඇති බව තානාපති කාර්යාලය සඳහන් කරයි. නෙදර්ලන්තය දෙවන ලෝක යුද්ධයෙන් පසුව සෑම වසරකම මැයි 04 වන දින මෙම අනුස්මරණ දිනය සමරනු ලබන අතර 1961 වසරේ සිට මෙම දිනය, 102,000 කට අධික නෙදර්ලන්ත යුදෙව්වන්, අනෙකුත් පීඩිත ප්රජාවන් මෙන්ම පසුකාලීන ගැටුම් සහ සාම සාධක මෙහෙයුම්වලදී දිවි අහිමි වූ සියලුම යුද වින්දිතයින් සිහිපත් කිරීම සඳහා වෙන් කර ඇත. නෙදර්ලන්තයේ ප්රධාන උත්සවය එරට රජුගේ සහ රජයේ නිලධාරීන්ගේ සහභාගීත්වයෙන් ‘ඩෑම් චතුරශ්රයේ’ පවත්වන අතර එරට වේලාවෙන් රාත්රී 8:00 ට මුළු රටම මිනිත්තු දෙකක නිශ්ශබ්දතාවයක් පවත්වමින් වින්දිතයින්ට උපහාර දැක්වීම සිදු කරයි.
