මධ්යම පෙරදිග පවතින උණුසුම්කාරී තත්ත්වය හමුවේ ඉහළ යන බොරතෙල් මිල නිසා පීඩාවට පත්ව සිටින අග්නිදිග ආසියානු රටවලට සහය වීම සඳහා ඇමරිකානු ඩොලර් බිලියන 10ක මූල්ය ආධාරයක් ලබා දීමට ජපානය තීරණය කර තිබේ. ජපන් අග්රාමාත්ය සානේ ටකායිචි (Sanae Takaichi) මහත්මිය බදාදා පැවති අන්තර්ජාල සාකච්ඡාවකදී මේ බව නිවේදනය කළාය.
“Power Asia” ලෙස නම් කර ඇති මෙම සහන වැඩපිළිවෙළ යටතේ ප්රධාන වශයෙන් ණය ආධාර ලබා දෙන අතර, එමඟින් බොරතෙල් සහ ඛනිජ තෙල් නිෂ්පාදන සුරක්ෂිත කර ගැනීමටත් හදිසි අවස්ථාවකදී සැපයුම් දාමය පවත්වා ගැනීමටත් අදාළ රටවලට අවස්ථාව හිමි වේ. මෙම අරමුදල හරහා ආසියාව තුළ තෙල් සංචිත පද්ධතියක් පුළුල් කිරීම, බලශක්ති ප්රභවයන් විවිධාංගීකරණය කිරීම සහ බලශක්ති සංරක්ෂණය ප්රවර්ධනය කිරීම ද අපේක්ෂා කෙරේ.
අග්නිදිග ආසියානු රටවලින් වෛද්ය සැපයුම් ඇතුළු නිෂ්පාදන රැසක් ආනයනය කරන ජපානය, එම කලාපයේ පවතින තෙල් හිඟය ජපානයේ ආර්ථිකයට ද දැඩි බලපෑමක් එල්ල කරනු ඇතැයි සැක පළ කරයි. මෙම සහනය හුදෙක් තෙල් ලබා දීමක් පමණක් නොව, ආසියානු ජාතීන් එකිනෙකාට සහයෝගය දක්වන වැඩපිළිවෙළක් බව අග්රාමාත්යවරිය වැඩිදුරටත් අවධාරණය කළාය.
