ජොන්සන් ඇන්ඩ් ජොන්සන් (Johnson & Johnson) සමාගමේ ටැල්ක් (talc) අඩංගු නිෂ්පාදන භාවිතය හේතුවෙන් කාන්තාවන් තිදෙනෙකුට ඩිම්බකෝෂ පිළිකා වැළඳී ඇති බවට ඔවුන්ගේ පවුල් විසින් ගොනු කර තිබූ නඩුවකින් එම සමාගම ජයග්රහණය කර තිබේ. ලොස් ඇන්ජලීස් අධිකරණයක ජූරි සභාවක් විසින් තීරණය කර ඇත්තේ, රූපලාවන්ය ටැල්ක් නිෂ්පාදන අලෙවි කිරීමේදී ජොන්සන් ඇන්ඩ් ජොන්සන් සමාගම නොසැලකිලිමත් ලෙස කටයුතු කර නොමැති බවයි.
මෙම නඩුව ගොනු කර තිබුණේ මේරි ඕවන්ස්, බොනී ටියන්කන් සහ ජිනීවා විලියම්ස් යන කාන්තාවන්ගේ පවුල් විසින් වන අතර, ඔවුන් ටැල්ක් අඩංගු බේබි පවුඩර් භාවිතයෙන් පසුව ඩිම්බකෝෂ පිළිකා වැළඳී මියගොස් තිබුණි. ජොන්සන් ඇන්ඩ් ජොන්සන් සමාගමේ බේබි පවුඩර් සහ අනෙකුත් ටැල්ක් නිෂ්පාදන පිළිකා කාරක බව පවසමින් මේ වන විට පැමිණිලිකරුවන් 67,000කට අධික පිරිසක් සමාගමට එරෙහිව නඩු ගොනු කර ඇත.
ජොන්සන් ඇන්ඩ් ජොන්සන් සමාගමේ නඩු කටයුතු භාර උප සභාපති එරික් හාස් ප්රකාශ කළේ, මෙම නඩුව පදනම් වී තිබුණේ විද්යාත්මක පදනමක් නොමැති කරුණු මත බවයි. කෙසේ වෙතත්, පැමිණිලිකරුවන් වෙනුවෙන් පෙනී සිටි නීතිඥ අරි ෆ්රීඩ්මන් මෙම තීන්දුව “බලාපොරොත්තු කඩ කරවන සුළු එකක්” බව සඳහන් කළේය.
මීට පෙර ඕක්ලහෝමා හිදී පැවති නඩු විභාගයකින්ද ජොන්සන් ඇන්ඩ් ජොන්සන් සමාගම ජයග්රහණය කළ අතර, සමහර නඩු විභාග වලදී පැමිණිලිකරුවන්ට විශාල වන්දි මුදල් පිරිනැමීමට ජූරි සභා තීරණය කර ඇත. මතභේදයට තුඩුදුන් ටැල්ක් අඩංගු බේබි පවුඩර් අලෙවිය 2020 වසරේදී ඇමරිකාව තුළ නතර කළ සමාගම, ඒ වෙනුවට ඉරිඟු පිටි (cornstarch) අඩංගු නිෂ්පාදන හඳුන්වා දී ඇත.
