ජාත්යන්තර කම්කරු දිනය සැමරීම වෙනුවෙන් ලබන මැයි 01 වැනිදා කොළඹ කේන්ද්ර කරගනිමින් පැවැත්වීමට නියමිතව තිබූ දැවැන්ත ජන සහභාගීත්වයකින් යුත් මැයි දින සැමරුම් සම්බන්ධයෙන් අද (29) පෙරවරුවේ විශේෂ ප්රකාශයක් නිකුත් විය. වත්මන් ලෝක දේශපාලන වාතාවරණය තුළ මැදපෙරදිග කලාපයේ හටගෙන ඇති යුදමය තත්ත්වයත් සමඟ මෙරටට එල්ල විය හැකි බලපෑම් සැලකිල්ලට ගනිමින්, ජාතික ජන බලවේගය සිය මැයි දින සැමරුම් උපායමාර්ගිකව වෙනස් කිරීමට තීරණය කර තිබේ. විශේෂයෙන්ම ඉන්ධන පිරිමැසීම වැනි ජාතික අවශ්යතාවලට මුල්තැන දෙමින් ගත් මෙම තීරණය පිළිබඳව ජනතා විමුක්ති පෙරමුණේ ප්රධාන ලේකම් ටිල්වින් සිල්වා මහතා අද මාධ්ය හමුවේ කරුණු පැහැදිලි කළේය.
ඒ අනුව මෙවර මැයි 01 වැනිදා කොළඹ නගරය කේන්ද්ර කරගනිමින් ප්රධාන මැයි දින සැමරුමක් සිදු නොකරන බවත්, ඒ වෙනුවට මුළු දිවයිනම ආවරණය වන පරිදි දිස්ත්රික්ක 21ක විමධ්යගතව මැයි දින රැලී පැවැත්වීමට කටයුතු යොදා ඇති බවත් ටිල්වින් සිල්වා මහතා මෙහිදී අනාවරණය කළේය. මැදපෙරදිග යුද්ධය හමුවේ රටක් ලෙස ඉන්ධන භාවිතය කළමනාකරණය කරගැනීම අත්යවශ්ය කරුණක් බව පෙන්වා දුන් ලේකම්වරයා, ජනතාව විශාල වශයෙන් කොළඹට ගෙන්වා ප්රවාහන අපහසුතා ඇති කරනවා වෙනුවට, ගම් මට්ටමින් කම්කරු ජනතාව සවිබල ගැන්වීමට මෙම තීරණය ගත් බව සඳහන් කළේය. මේ හරහා දිවයින පුරා එකවර මැයි දින රැලී 21ක් අභිමානවත් අයුරින් පැවැත්වීමට මේ වන විටත් සියලු සංවිධාන කටයුතු අවසන් කර තිබේ.
මෙම තීරණය හුදෙක් සැමරුම් උත්සවයක් වෙනස් කිරීමක් පමණක් නොව, එය පවතින ගෝලීය අර්බුද හමුවේ වගකිවයුතු දේශපාලන ව්යාපාරයක් ලෙස පටු පරමාර්ථවලින් බැහැරව පොදු මහජනතාවගේ සහ රටේ අනාගතය පිළිබඳව සිතා ගත් සාධනීය පියවරකි. කොළඹට සීමා වූ දේශපාලනය වෙනුවට ජනතාව සිටින ගමටම මැයි දින උදෑසන රැගෙන යාම හරහා නව දේශපාලන සංස්කෘතියක සේයාවන් පෙන්නුම් කරන බව දේශපාලන විචාරකයෝ පවසති. කම්කරු ජනතාවගේ අයිතීන් වෙනුවෙන් හඬ නගන අතරතුර රටේ සම්පත් සුරැකීමට ජාතික ජන බලවේගය ගත් මෙම සුවිශේෂී ක්රියාමාර්ගය, ඉදිරි මැයි දිනයේදී මෙරට දේශපාලන ක්ෂේත්රයේ නව හැරවුම් ලක්ෂ්යයක් වනු නොඅනුමානය.
