රුහුණු මහා කතරගම දේවාලයට අයත් කුඹුරු යායේ අස්වැන්න, සම්ප්රදායික ගව තවලමකින් දේවාල පරිශ්රය කරා රැගෙන විත් වී ගබඩාවේ තැන්පත් කිරීමේ ඓතිහාසික චාරිත්රය ඊයේ (14) දින ඉතා ගෞරවාන්විතව පැවැත්විණි. කතරගම ඇසළ මංගල්යයට සමගාමීව සිදුකෙරෙන මෙම අභිමානවත් චාරිත්රය, දුටුගැමුණු මහා රජතුමාගේ රාජාඥා පරිදි අදටත් නොපිරිහෙළා ඉටු කරනු ලබයි.
පැරණි ක්රමවේදයට අනුව ගවයන් යොදාගනිමින් අස්වනු නෙළා, ඉතා පිරිසිදුව සකස් කරන ලද වී සහ සහල් මෙලෙස ගවයන්ගේ පිට මත පටවා කතරගම දේවාලය කරා රැගෙන එනු ලබන්නේ, දෙවියන්ගේ දානය (මුරුතැන් පූජාව) සහ දේවාලයේ රාජකාරිකරුවන්ගේ සේවා දායකත්වය වෙනුවෙන් මෙම අස්වැන්න වෙන් කර ගැනීම සඳහාය. අතීතයේ සිට පැවත එන මෙම පුරාණ කෘෂිකාර්මික සහ ආගමික චාරිත්රය කිසිදු වෙනසකින් තොරව අදටත් පවත්වාගෙන යාම සුවිශේෂී සංස්කෘතික සිදුවීමකි.
