කතරගම වාර්ෂික ඇසළ මහා පෙරහර මංගල්යයට සමගාමීව මෙවරත් කිරිවෙහෙර රාජමහා විහාරස්ථානය මුල් කරගනිමින් විශේෂ ආගමික හා සුභසාධන වැඩසටහන් රැසක් ක්රියාත්මක කිරීමට සැලසුම් කර ඇති බව රුහුණු මාගම්පත්තුවේ ප්රධාන සංඝනායක, කිරිවෙහෙර රාජමහා විහාරය ඇතුළු සිව් මහා විහාරාධිපති කොබවක ධම්මින්ද නාහිමියන් පවසති. ඇසළ උත්සවය සම්බන්ධයෙන් මාධ්ය වෙත අදහස් දක්වමින් උන්වහන්සේ ඊයේ (15) මේ බව ප්රකාශ කළහ.
එහිදී උන්වහන්සේ පෙන්වා දුන්නේ මෙවර කතරගම දෙවියන් වෙනුවෙන් පැවැත්වෙන්නේ 2187 වැනි පෙරහර මංගල්යය බවයි. කතරගම මහ දේවාලය සහ කිරිවෙහෙර යනු එකිනෙකට බැඳී පවතින පූජනීය ස්ථාන දෙකක් බැවින්, ඇසළ පෙරහර මංගල්යයට සමගාමීව පැවැත්වෙන ආගමික කටයුතුවලට අමතරව කතරගමට පැමිණෙන ලක්ෂ සංඛ්යාත බැතිමතුන්ගේ සුව පහසුව පිණිස සුභසාධන වැඩසටහන් රැසක් ක්රියාවට නංවා ඇති බවද උන්වහන්සේ සඳහන් කළහ.
සිය ශාසනික මෙහෙවර පිළිබඳව අදහස් දැක්වූ උන්වහන්සේ තමන් මුහුණ දුන් අමිහිරි අත්දැකීම් පිළිබඳවද මෙලෙස සිහිපත් කළහ:
“මාගේ ගුරු නායක හාමුදුරුවන් වහන්සේ අපවත් වුණාට පසුව මම විහාරාධිපති ලෙස පත් වූ දා සිටම මට විවිධ බාධක, අපහාස, නින්දා පැමිණියා. 2018 වසරේ මම වෙඩි ප්රහාරයකට ලක් වුණා. අදටත් එහි බලපෑම නිසා මාගේ දකුණු පාදය ආබාධිත තත්ත්වයේ තියෙන්නේ. මාව ගතින් ඝාතනය කරන්න බැරි වුණු පිරිස් අද සමාජ මාධ්ය උපයෝගි කරගෙන මගේ චරිතය ඝාතනය කිරීමට පටන්ගෙන තිබෙනවා. නමුත් මම මේ කිසිවකින් කම්පා වන්නේ නෑ. අදටත් ඉදිරියටත් සමස්ත ජනතාව වෙනුවෙන් සිදු කළ යුතු ශාසනික, ආගමික සහ සමාජ සුභසාධන කටයුතු නොපිරිහෙලා ඉටු කිරීම මගේ අරමුණයි.”
බොහෝ දෙනෙක් කතරගම පඬුරු පෙට්ටිය ගැන කතා කළද, මෙම විහාරස්ථාන මඟින් ගම්වාසීන්, රටවාසීන් මෙන්ම දිවයිනේ අනෙකුත් විහාරස්ථාන වෙනුවෙන් සිදු කෙරෙන මහා සේවාවන් පිළිබඳව සමාජය නොදන්නා බවද උන්වහන්සේ වැඩිදුරටත් අවධාරණය කළහ.
