තමන් අනුරාධපුරයේ සිට ආවාද, නැතහොත් කොහේ සිට ආවාද යන්න පිළිබඳව ප්රශ්න කිරීමට කිසිවෙකුට අයිතියක් නොමැති බව කෘෂිකර්ම, ඉඩම්, වාරිමාර්ග සහ පශු සම්පත් අමාත්ය කේ. ඩී. ලාල්කාන්ත පවසයි. තමාට මහනුවර මාලිගාවක් තිබේද යන්න ගවේෂණය කර සොයා බැලීම ගවේෂණශීලී මාධ්යවේදීන්ගේ කාර්යභාරයක් බව ද අමාත්යවරයා සඳහන් කළේය. මහනුවර දිස්ත්රික් ලේකම් කාර්යාලයේ පැවති රැස්වීමකින් පසුව මාධ්යවේදීන් නැඟූ ප්රශ්න කිහිපයකට පිළිතුරු දෙමින් ඔහු මේ බව ප්රකාශ කර තිබේ.
එහිදී වැඩිදුරටත් අදහස් දැක්වූ අමාත්යවරයා කියා සිටියේ, ඊනියා ප්රභූ පාලකයන් යැයි කියා ගන්නා පිරිසක් මේ රටේ බලයේ සිටියදී ජනතාවගේ මුදල් ගසා කමින්, වංචා දූෂණ සිදුකරමින් කෝටි ප්රකෝටි ගණන් උපයා ගත් බවයි. දැන් ඔවුන්ට බලය, වරප්රසාද, විශ්රාම වැටුප්, වාහන මෙන්ම මන්දිර පවා අහිමි වී ඇති බැවින් ඔවුන් කලබල වී වෙනස්කම් අපේක්ෂා කරන බව ද ඔහු පැවසීය. වංචා දූෂණවලට සම්බන්ධ ප්රභූ දේශපාලනඥයන් සහ වැරදිකරුවන් අත්අඩංගුවට ගනිමින්, ජනාධිපතිවරුන්ගෙන් පවා කටඋත්තර ගනිමින් අදාළ නීති අංශ මඟින් පරීක්ෂණ පවත්වන නිසා ඔවුන් මෙලෙස කලබල වී සිටින බව ද අමාත්යවරයා පෙන්වා දුන්නේය.
තමන්ට මාලිගාවල් නොමැති බවත්, මේ සියලු ප්රශ්න මතු කරන්නේ ජනතාවගේ මුදල් ගසා කාලා චෝදනාවලට ලක්වූ පුද්ගලයන් බවත් පැවසූ කේ. ඩී. ලාල්කාන්ත, තමන් එවැනි දේවලින් කලබල නොවන බවත් තමන් කොහෙන් පැමිණියේද යන්න කිසිවෙකුත් ගැටලුවක් කරගත යුතු නැති බවත් අවධාරණය කළේය.
