පොල්ගස්ඕවිට, හල්පිට ප්‍රදේශයේ කුලී නිවසක රැඳී සිටිමින් හෙරොයින් ජාවාරමේ සහ ඇසුරුම් කිරීමේ නිරත වූ බව කියන සංවිධානාත්මක අපරාධ කල්ලියකට සම්බන්ධ සැකකරුවන් හය දෙනෙකු අත්අඩංගුවට ගෙන තිබේ. ඒ අතර කාන්තාවන් දෙදෙනෙකුද සිටින බව පොලිසිය සඳහන් කරයි.
කැස්බෑව පොලිස් ස්ථානාධිපතිවරයාට ලැබුණු රහසිගත තොරතුරක් මත සිදුකළ වැටලීමකදී සැකකරුවන් අත්අඩංගුවට ගෙන ඇති අතර, ඔවුන් සන්තකයේ තිබී හෙරොයින් ග්‍රෑම් 112ක්, විද්‍යුත් තරාදියක් සහ මත්ද්‍රව්‍ය ඇසුරුම් කිරීමට යොදාගන්නා කුඩා කඩදාසි තොගයක් සොයාගෙන තිබේ. අත්අඩංගුවට ගත් හෙරොයින් තොගයේ වටිනාකම රුපියල් ලක්ෂ 56කට ආසන්න බව වාර්තා වේ.
අත්අඩංගුවට පත්වූවන් අතර අඹුසැමි යුවළක්ද සිටින බව පොලිසිය පවසයි. එම පිරිස අතර බොරලැස්ගමුව ප්‍රදේශයේ නිවසකට කඩා වැදී කාන්තාවකට බරපතළ තුවාල සිදුකිරීමේ සිද්ධියකට සම්බන්ධ ප්‍රධාන සැකකරුවෙකුද සිටින බව සඳහන් වේ.
ප්‍රධාන සැකකරුගෙන් කළ ප්‍රශ්න කිරීම්වලදී හෙරොයින් තොගය සංවිධානාත්මක අපරාධකරුවෙකු සහ මත්ද්‍රව්‍ය ජාවාරම්කරුවෙකු ලෙස හඳුන්වන ‘බෝධියවත්තේ අවිශ්ක’ නමැත්තාට අයත් බවට තොරතුරු අනාවරණය වූ බව වාර්තා වේ. ඔහුගේ දුරකථන උපදෙස් මත විවිධ ස්ථානවලට මත්ද්‍රව්‍ය බෙදාහැරීමේ ජාලයක් පවත්වාගෙන ගොස් ඇති බවටද සැක කෙරේ.
අත්අඩංගුවට ගත් සැකකරුවන් අධිකරණයට ඉදිරිපත් කර රැඳවුම් නියෝග ලබාගැනීමට නියමිත අතර, සිද්ධිය සම්බන්ධයෙන් කැස්බෑව පොලිසිය වැඩිදුර විමර්ශන සිදුකරයි.
