බ්රිතාන්යයේ තෙවන චාල්ස් රජු සහ කැමිලා රැජින අප්රේල් 27 වනදා සිට 30 වනදා දක්වා අමෙරිකා එක්සත් ජනපදයේ නිල සංචාරයක නිරත වීමට නියමිත බව බකිංහැම් මාළිගය නිවේදනය කර තිබේ. මෙම සංචාරයේ ප්රධාන අරමුණ වන්නේ අමෙරිකානු නිදහසේ 250 වැනි සංවත්සරය සනිටුහන් කරමින් සංවිධානය කර ඇති උත්සව මාලාවකට සහභාගී වීමයි. සංචාරය අතරතුර රජු විසින් අමෙරිකානු කොංග්රස් මණ්ඩලයේ ඒකාබද්ධ සැසියක් ඇමතීමට සහ ජනාධිපති ඩොනල්ඩ් ට්රම්ප් සමඟ පෞද්ගලික සාකච්ඡා පැවැත්වීමට ද නියමිතව ඇත.
ඉරානයට එරෙහිව අමෙරිකාව ගෙන යන යුධමය ක්රියාමාර්ග සඳහා බ්රිතාන්ය රජය පූර්ණ සහාය ලබා නොදෙන බව පවසමින් ජනාධිපති ට්රම්ප් පසුගිය සති කිහිපය පුරා බ්රිතාන්යය විවේචනය කර තිබුණි. එවැනි පසුබිමක මෙම සංචාරය සිදුවීම දෙරට අතර පවතින “සුවිශේෂී සබඳතාව” (Special Relationship) යළි තහවුරු කිරීමට ගන්නා උත්සාහයක් ලෙස දේශපාලන විචාරකයෝ පෙන්වා දෙති. චාල්ස් රජු මෙහිදී වොෂින්ටන් ඩී.සී., නිව්යෝර්ක් සහ වර්ජිනියා යන ප්රදේශවල සංචාරය කිරීමට සැලසුම් කර ඇත.
