මුලතිව් ඓතිහාසික කුරුන්දි රජමහා විහාරස්ථානයේ ආරක්ෂාව සඳහා යොදවා සිටි පොලිස් නිලධාරීන් හදිසියේ ඉවත් කිරීමට ගත් පියවර සම්බන්ධයෙන් විහාරාධිපති පූජ්යපාද ගල්ගමුවේ සන්තබෝධි නායක ස්වාමීන් වහන්සේ බුද්ධශාසන, ආගමික හා සංස්කෘතික කටයුතු අමාත්යවරයා වෙත ලිපියක් යොමු කරමින් සිය දැඩි නොසතුට සහ කණගාටුව පළ කර සිටීමත් සමඟ ආගමික හා පුරාවිද්යාත්මක ආරක්ෂාව පිළිබඳ නව ආන්දෝලනාත්මක තත්ත්වයක් මතු වී තිබේ.
විහාර භූමියේ කැණීම් සහ සංරක්ෂණ කටයුතු ආරම්භ කළ අවධියේ පටන් පුරාවිද්යා රක්ෂිතයේ මෙන්ම බැතිමතුන්ගේ ආරක්ෂාව තහවුරු කිරීමටත්, අනවසරයෙන් ඇතුළු වී හානි කිරීමට උත්සාහ කළ පුද්ගලයන් අත්අඩංගුවට ගැනීමටත් පොලිසිය ඉටු කළ සුවිශේෂී කාර්යභාරය උන්වහන්සේ මෙම ලිපිය මගින් පෙන්වා දී ඇති අතර, දැනට යොදවා ඇති යුද හමුදා හෝ සිවිල් ආරක්ෂක බළකායට නීතිමය අත්අඩංගුවට ගැනීම් සිදු කිරීමේ බලයක් නොමැති වීම නිසා විහාරස්ථානය සහ පුරාවිද්යා රක්ෂිතය දැඩි අවදානමකට ලක්ව ඇති බව අවධාරණය කර ඇත.
අන්තවාදී කණ්ඩායම්වල නීති විරෝධී ක්රියා සහ උද්ඝෝෂණ වැළැක්වීමේ සිවිල් ආරක්ෂක බලය ඇත්තේ පොලිසියට පමණක් වන බැවින්, ඉවත් කරන ලද පොලිස් ආරක්ෂාව වහාම යළි ලබා දෙන ලෙස විහාරාධිපති හිමියන් ඉල්ලා සිටින පසුබිමක, ආගමික ස්ථානවල සහ පුරාවිද්යා ස්මාරකවල සුරක්ෂිතතාව සම්බන්ධයෙන් රජය ගනු ලබන ඉදිරි ප්රතිපත්තිමය තීරණ කෙරෙහි මේ වන විට සමස්ත රටේම දැඩි අවධානයක් යොමු වී තිබේ.
