ගොවියාට කිසිදු අසාධාරණයක් සිදු නොවනු ඇති බව සහතික කරමින්, සියලු පාර්ශ්වයන්ගේ අදහස් සැලකිල්ලට ගනිමින් වී මිල තීරණය කරන බව කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල්කාන්ත මහතා ප්රකාශ කළේය. ඒ මහතා මේ බව පැවසුවේ ඊයේ (22) ගොවිජන මන්දිරයේදී ගොවි සංගම් නියෝජිතයන් සමඟ පැවති විශේෂ සාකච්ඡාවකදීය.
දිවයිනේ විවිධ ප්රදේශ නියෝජනය කරමින් පැමිණි ගොවි සංගම් නියෝජිතයන් මෙහිදී තම ප්රදේශවලට බලපාන ගැටලු සහ යෝජනා අමාත්යවරයා වෙත ඉදිරිපත් කළහ. පසුගිය කන්නයේදී රජයේ වී මිල පාලනය වුවද පෞද්ගලික වෙළෙඳුන්ගේ මිල පාලනය නොවූ බවත්, නාඩු වී මිල ඉහළ දැමීමේ අවශ්යතාව සහ නිෂ්පාදන පිරිවැය පාලනයට රජයේ මැදිහත්වීම වැදගත් බවත් ඔවුහු පෙන්වා දුන්හ. එසේම වී අලෙවි මණ්ඩලය සඳහා මුදල් වෙන් කිරීමේදී දිස්ත්රික්ක මට්ටමින් වෙන් කිරීමේ වැදගත්කම සහ ගොවීන්ට සාධාරණ මිලක් ලබාදීමේ අවශ්යතාව ද ගොවි සංගම් නියෝජිතයෝ අවධාරණය කළහ.
මෙම කරුණු සියල්ල සලකා බලා වී මිල තීරණය කරන බවත්, වර්තමාන රජය ජනතා හිතවාදී රජයක් බැවින් ගොවියා රැක ගැනීමට කැපවන බවත් අමාත්යවරයා සහ නියෝජ්ය ඇමැති නාමල් කරුණාරත්න මහතා සහතික විය. වී අලෙවි මණ්ඩලය ගොයම් කපන කාලයේදී වී මිලදී ගැනීම සඳහා විවෘත කිරීමට මේ වන විටත් සියලු කටයුතු සූදානම් කර ඇති බව ද ඔවුහු සඳහන් කළහ.
බිම් මට්ටමේ ගොවියා රැක ගැනීමට රජය දරන මෙම උත්සාහය සම්බන්ධයෙන් ගොවි සංගම් නියෝජිතයෝ රජයට සිය ප්රසාදය පළ කළහ.
