ඩිට්වා (Ditwa) සුළි කුණාටුව හේතුවෙන් දැඩි ලෙස විපතට පත් වූ මෙරට ජනතාවට සහන සැලසීම සහ පීඩාවට පත් ප්රදේශ නැවත ප්රතිසංස්කරණය කිරීම වෙනුවෙන් රජය විසින් ස්ථාපිත කරන ලද ‘Rebuilding Sri Lanka’ ජාතික අරමුදලට රුපියල් මිලියන 10ක (රුපියල් කෝටියක) දැවැන්ත මූල්යමය පරිත්යාගයක් පිරිනැමීමට විදේශගත ශ්රී ලාංකිකයකු කටයුතු කර තිබේ. දැනට විදේශගතව පසුවන ලෝරන්ස් එරල් කුමාරවෙල් මාටි (Lawrence Errol Coomarawel Marti) මහතා විසින් සිය පෞද්ගලික ධනයෙන් මෙම උදාර මූල්යමය පරිත්යාගය සිදු කර ඇති අතර, එය වත්මන් ආපදා සහන මෙහෙයුම් කඩිනම් කිරීමට විශාල ශක්තියක් වනු ඇත.
මෙම පරිත්යාගයට අදාළ නිල චෙක්පත පසුගිය 29 වනදා ජනාධිපති කාර්යාලයේදී ජනාධිපති කාර්ය මණ්ඩල ප්රධානී ප්රභාත් චන්ද්රකීර්ති මහතා වෙත නිල වශයෙන් භාර දීමට ලෝරන්ස් එරල් කුමාරවෙල් මාටි මහතා පියවර ගත්තේය. මෙරට ජනතාව ස්වභාවික ආපදාවන් නිසා දැඩි දුෂ්කරතාවලට මුහුණ දී සිටින මෙවැනි සංවේදී මොහොතක, විදේශගත ශ්රී ලාංකික ප්රජාව මව්බිම වෙනුවෙන් දක්වන දායකත්වය සහ මානුෂීය මැදිහත්වීම රජයේ මෙන්ම සමස්ත මහජනතාවගේ ද ඉහළ ඇගයීමට ලක්ව තිබේ.
ඩිට්වා සුළි කුණාටුවේ බලපෑමෙන් අවතැන් වූ සහ දේපළ අහිමි වූ දහස් සංඛ්යාත ජනතාවට කඩිනම් සහන සැලසීම, නිවාස ප්රතිසංස්කරණය සහ අත්යවශ්ය යටිතල පහසුකම් නැවත ගොඩනැඟීම සඳහා මෙම අරමුදල් විනිවිදභාවයකින් යුතුව උපයෝගී කර ගැනීමට කටයුතු කරන බව ජනාධිපති කාර්යාලයේ උසස් නිලධාරීහු මෙහිදී ප්රකාශ කළහ. ආපදාවට පත් පවුල් යථා තත්ත්වයට පත් කිරීම සඳහා දේශීය මෙන්ම ජාත්යන්තර මට්ටමින් ලැබෙන මෙවැනි ආධාර උපරිම කාර්යක්ෂමතාවයකින් යුතුව අදාළ දිස්ත්රික්ක වෙත බෙදා හැරීමට වත්මන් රජය විශේෂ වැඩපිළිවෙළක් ක්රියාත්මක කර ඇත.
