තම හිටපු පෙම්වතිය වූ ප්රසිද්ධ වේශ නිරූපණ ශිල්පිනී ඇලී ෂෙහෝර්න් සාහසික ලෙස ඝාතනය කිරීමට තැත් කිරීම ඇතුළු බරපතළ අපරාධ චෝදනා රැසකට වැරදිකරු වූ “How I Met Your Mother” කතා මාලාවේ රංගනයෙන් දායක වූ හොලිවුඩ් නළු නික් පැස්කුවල් හට වසර 32ක සිට ජීවිතාන්තය දක්වා වන දීර්ඝ සිරදඬුවමක් ලොස් ඇන්ජලීස් අධිකරණය විසින් නිල වශයෙන් නියම කර තිබේ. 36 හැවිරිදි මෙම නළුවා ඉකුත් මැයි මාසයේදී පැවැති දීර්ඝ නඩු විභාගයකින් පසු මනුෂ්ය ඝාතනයකට තැත් කිරීම, බලහත්කාරයෙන් දූෂණය කිරීම, පළමු උපාධියේ නිවාස බිඳීම සහ ගෘහස්ථ ප්රචණ්ඩත්වය යන සියලුම චෝදනාවලට වැරදිකරු බවට ජූරි සභාව විසින් ඒකමතිකව තීන්දු කර තිබිණි. මෙම අපරාධය සිදුකර සැකකාර නළුවා මෙක්සිකෝ දේශසීමාව හරහා පලායාමට උත්සාහ කිරීමේදී ටෙක්සාස් හි සියේරා බ්ලැන්කා මුරපොලේදී ආරක්ෂක අංශ විසින් අත්අඩංගුවට ගෙන පසුව ලොස් ඇන්ජලීස් වෙත පිටුවහල් කරනු ලැබීය.
නඩු විභාගයේදී අනාවරණය වූ තොරතුරුවලට අනුව, මෙම දෙදෙනා 2023 වසරේදී “Rebel Moon” සිනමාපටයේ රූගත කිරීම් අතරතුරදී මුලින්ම හමුවී ආදර සන්ධානයක් ආරම්භ කර තිබේ. කෙසේ වෙතත්, 2024 මැයි 18 වනදා ඇලීට එරෙහිව සිදුකළ ගෘහස්ථ ප්රචණ්ඩත්ව චෝදනාවක් මත ලොස් ඇන්ජලීස් පොලීසිය විසින් නික්ව අත්අඩංගුවට ගත් අතර, පසුව ඔහු ඩොලර් 50,000ක ඇප මත නිදහස් විය. ඉන් අනතුරුව මැයි 20 වනදා ඇලී විසින් ඔහුට එරෙහිව අධිකරණයෙන් තහනම් නියෝගයක් ලබාගත්ත ද, මැයි 23 වනදා අලුයම 4.30 ට පමණ ඇගේ නිවස බිඳ ඇතුළු වූ නික්, ඇයට 20 වතාවකට වඩා පිහියෙන් ඇන මාරාන්තික තුවාල සිදුකර පලාගියේය. පසුව ඇගේ සමීපතම මිතුරියක විසින් ඇයව සොයාගෙන රෝහල් ගත කිරීම නිසා පැය 14ක දැවැන්ත ශල්යකර්මයකින් පසු ඇගේ ජීවිතය බේරාගැනීමට වෛද්යවරුන් සමත් විය.
වසර දෙකකට ආසන්න කාලයක් පැවැති මූලික පරීක්ෂණවලින් පසු 2026 අප්රේල් 27 වනදා නික් පැස්කුවල්ට එරෙහි මහාධිකරණ නඩු විභාගය නිල වශයෙන් ආරම්භ වූ අතර, මැයි 08 වනදා ඔහු සියලුම සාහසික අපරාධ චෝදනාවලට වැරදිකරු බවට අධිකරණය තීන්දු කළේය. ලොස් ඇන්ජලීස් දිස්ත්රික් නීතිඥ ජෝර්ජ් ගැස්කොන් ප්රකාශ කළේ, මෙම ඛේදජනක සිදුවීම ගෘහස්ථ ප්රචණ්ඩත්වයේ ඇති බිහිසුණු බව නැවත වරක් සමාජයට පසක් කර දෙන බවත්, වින්දිත ඇලී ෂෙහෝර්න් ලැබූ කායික හා මානසික කැලඹීම්වලින් සුවය ලැබීම සඳහා උපරිම සහයෝගය ලබා දෙන බවත්ය. නික් පැස්කුවල් “How I Met Your Mother” කතා මාලාවට අමතරව “Homecoming”, “Rebel Moon” සහ “Poor Paul” වැනි ජනප්රිය හොලිවුඩ් නිර්මාණ සඳහා දායක වී ඇති අයෙකි.
