2027 වසර සඳහා ලිට්‍රෝ ගෑස් ලංකා සමාගමට ද්‍රව පෙට්‍රෝලියම් ගෑස් (LPG) සැපයීමේ කොන්ත්‍රාත්තුව OQ Trading Limited සමාගම වෙත පිරිනැමීමට අමාත්‍ය මණ්ඩල අනුමැතිය හිමිව තිබේ.
ඒ අනුව, 2027 ජනවාරි 1 වැනිදා සිට මාස 12ක කාලයක් සඳහා LPG මෙට්‍රික් ටොන් 420,000ක් සැපයීමට නියමිතය. එම ප්‍රමාණය 20%කින් වැඩි කිරීමට හෝ අඩු කිරීමට හැකි අතර, අවම වශයෙන් මෙට්‍රික් ටොන් 336,000ක සැපයුමක් සහතික කර තිබේ.
ජාත්‍යන්තර තරගකාරී ලංසු කැඳවීම යටතේ ලංසු හතරක් ලැබී ඇති අතර, ඒවා ඇගයීමෙන් අනතුරුව අදාළ කොන්ත්‍රාත්තුව OQ Trading Limited සමාගමට පිරිනැමීමට නිර්දේශ කර ඇත.
සැපයුම් මිල සෞදි අරම්කෝ කොන්ත්‍රාත් මිලට අමතරව LPG මෙට්‍රික් ටොන් එකකට ඇමෙරිකානු ඩොලර් 133.93ක් එකතු කරන පදනම මත තීරණය කර තිබේ. රක්ෂණ සහ ප්‍රවාහන වියදම් ඇතුළත් CIF මිල පදනම යටතේ මෙම සැපයුම සිදුකිරීමට නියමිතය.
