වත්මන් රජයට රට තබා අවම වශයෙන් බන්ධනාගාරයක්වත් පාලනය කර ගැනීමට නොහැකි වී ඇති බව සමගි ජන බලවේගයේ මහලේකම්, පාර්ලිමේන්තු මන්ත්රී රංජිත් මද්දුම බණ්ඩාර මහතා චෝදනා කරයි. මහර බන්ධනාගාරයේ ඇති වූ නොසන්සුන්කාරී තත්ත්වය පිළිබඳව අදහස් දක්වමින් ඒ මහතා මේ බව සඳහන් කළේය.ජනාධිපතිවරයා විපක්ෂයේ සිටියදී බන්ධනාගාර රැඳවියන්ගේ වගකීම රජය සතු බව ප්රකාශ කළද, අද වන විට එම වගකීම ඉටු කිරීමට රජය අසමත් වී ඇති බව පෙන්වා දුන් මන්ත්රීවරයා, මීගමුව බන්ධනාගාරයේදී රැඳවියන් 30කට අධික පිරිසක් මියගිය බවත්, ඊයේ මහර බන්ධනාගාරයේදීද රැඳවියෙකු මියගොස් විශාල පිරිසක් තුවාල ලබා ඇති බවත් සිහිපත් කළේය. මෙම අසාර්ථකත්වය හමුවේ විෂයභාර අමාත්යවරයා වහාම ධුරයෙන් ඉල්ලා අස්විය යුතු බව අවධාරණය කළ හෙතෙම, බන්ධනාගාරවල රැඳවිය හැකි ධාරිතාව 10,800ක් වුවත්, අද වන විට 43,000කට අධික පිරිසක් එහි රඳවා සිටින බවත් සඳහන් කළේය.
රට මේ වන විට අරාජික තත්ත්වයකට පත්ව ඇති බවත්, තැන තැන වෙඩි තැබීම් සහ ප්රචණ්ඩ ක්රියා ඉහළ ගොස් ඇති බවත් පෙන්වා දුන් මන්ත්රීවරයා, විනිසුරුවරුන්ගේ විශ්රාම වයස දීර්ඝ කිරීමට ගෙන ඇති තීරණයට නීතිඥ සංගමය, විනිසුරුවරුන් මෙන්ම සමස්ත විපක්ෂයද විරුද්ධ බව වැඩිදුරටත් කියා සිටියේය.
