2013 වසරේ ශ්රීලන්කන් ගුවන් සමාගම සඳහා එයාර්බස් වර්ගයේ ගුවන් යානා මිලදී ගැනීමේදී ඇමෙරිකානු ඩොලර් මිලියන 02ක අල්ලසක් ලබාගත්තේ යැයි කියන සිද්ධියට අදාළව, හිටපු ජනාධිපති මහින්ද රාජපක්ෂ මහතා අද (12) අල්ලස් හෝ දූෂණ විමර්ශන කොමිෂන් සභාව හමුවේ ප්රකාශයක් ලබා දුන්නා. අද උදෑසන 9.30ට පමණ කොමිසම හමුවට පැමිණි ඒ මහතා පැය දෙකකට අධික කාලයක් ප්රකාශ ලබාදීමෙන් අනතුරුව පෙරවරු 11.50ට පමණ ඉන් පිටව ගොස් තිබෙනවා. හිටපු ජනාධිපතිවරයා කොමිසම හමුවේ පෙනී සිටි අවස්ථාවේදී හිටපු ජනාධිපති ගෝඨාභය රාජපක්ෂ මහතා ඇතුළු පාක්ෂිකයින් රැසක් ඔහුට සහය පළ කිරීම සඳහා එම පරිශ්රයට රැස්ව සිටියා.
මෙම විමර්ශනයට පදනම් වී ඇත්තේ ශ්රීලන්කන් ගුවන් සේවයේ හිටපු ප්රධාන විධායක නිලධාරී මියගිය කපිල චන්ද්රසේන මහතා විසින් සිදුකළ බව කියන ප්රකාශයකි. ප්රශ්නගත ගනුදෙනුවෙන් ලැබුණු අල්ලස් මුදලින් රුපියල් මිලියන 60ක් එවකට ජනාධිපති මහින්ද රාජපක්ෂ මහතාටත්, රුපියල් මිලියන 20ක් එවකට අමාත්ය පියංකර ජයරත්න මහතාටත් ලබාදුන් බවට කපිල චන්ද්රසේන මහතා මීට පෙර කොමිසම හමුවේ පවසා තිබූ බව අධිකරණයේදී අනාවරණය වුණා. කෙසේ වෙතත්, එම ප්රකාශය බලහත්කාරයෙන් ලබාගත්තක් බව දන්වමින් කපිල චන්ද්රසේන මහතා පසුව දිවුරුම් ප්රකාශයක් ඉදිරිපත් කළ අතර, පසුගිය සිකුරාදා ඔහුගේ මළ සිරුර නිවසක තිබී අභිරහස් ලෙස සොයාගැනුණා. මෙම තීරණාත්මක විමර්ශනයට අදාළව ප්රකාශ ලබාදීමට අද දිනයේ හිටපු අමාත්ය පියංකර ජයරත්න මහතාටද අල්ලස් කොමිසම හමුවේ පෙනී සිටින ලෙස දන්වා තිබෙනවා.
