හිටපු ජනාධිපති මහින්ද රාජපක්ෂ මහතා හෙට (12) පෙරවරු 9.00ට අල්ලස් හෝ දූෂණ චෝදනා විමර්ශන කොමිෂන් සභාව හමුවේ පෙනී සිටින බව ඔහුගේ මාධ්ය ප්රකාශක නීතිඥ මනෝජ් ගමගේ මහතා තහවුරු කළේය. එයාර් බස් ගනුදෙනුව සම්බන්ධ විමර්ශනයකට අදාළව මෙම කැඳවීම සිදු කර ඇති අතර, හිටපු ජනාධිපතිවරයා ප්රශ්න කිරීම්වලින් පලා නොයන බැවින් හෙට දිනයේ අනිවාර්යයෙන්ම කොමිසම හමුවට පැමිණෙන බව ඔහු සඳහන් කළේය.
කෙසේ වෙතත්, මෙම කැඳවීම සිදුකර ඇත්තේ මියගිය ශ්රී ලන්කන් හිටපු ප්රධාන විධායක නිලධාරී කපිල චන්ද්රසේන මහතා විසින් බලහත්කාරයෙන් ලබා දුන් බව කියන පාපොච්චාරණයක් මත පදනම්ව බැවින් එය නීති විරෝධී ක්රියාවක් බව නීතිඥ මනෝජ් ගමගේ මහතා චෝදනා කරයි. එම ප්රකාශය තර්ජනය කර ලබා ගත් එකක් බවට කපිල චන්ද්රසේන මහතා ජීවත්ව සිටියදීම අධිකරණයට දිවුරුම් ප්රකාශයක් ලබා දී ඇති බවත්, එවැනි පසුබිමක සිදුකරන මෙම කැඳවීම සම්බන්ධයෙන් අදාළ පාර්ශ්වයන්ට එරෙහිව නීතිමය පියවර ගන්නා බවත් ඔහු වැඩිදුරටත් අනාවරණය කළේය. මේ සම්බන්ධ ඉදිරි නීතිමය ක්රියාමාර්ග පිළිබඳව සාකච්ඡා කිරීමට අද පස්වරුවේ විශේෂ නීතිඥ කණ්ඩායමක් හමුවීමට ද නියමිතය.
