එංගලන්තයේ වුල්වර්හැම්ප්ටන් විශ්වවිද්යාලයේ උපාධි ප්රදානෝත්සවයකට සහභාගි වීම සඳහා රුපියල් ලක්ෂ 166කට අධික රජයේ මුදල් අවභාවිත කළ බවට එල්ල වී ඇති චෝදනාව සම්බන්ධයෙන් හිටපු ජනාධිපති රනිල් වික්රමසිංහ මහතාගේ බිරිඳ වන මහාචාර්ය මෛත්රී වික්රමසිංහ මහත්මිය සැකකාරියක ලෙස නම් කිරීමට නීතිපතිවරයාගේ අවධානය යොමුව ඇති බව ඊයේ (29) කොටුව මහේස්ත්රාත් අධිකරණයේදී අනාවරණය විය. හිටපු ජනාධිපතිවරයා සහ මෛත්රී වික්රමසිංහ මහත්මිය ලබා දී ඇති ප්රකාශ අතර බරපතළ පරස්පරතා පවතින බව නීතිපති දෙපාර්තමේන්තුව මෙහිදී අධිකරණයට පෙන්වා දුන්නේය. මෛත්රී වික්රමසිංහ මහත්මිය සිය ස්වාමිපුරුෂයාට එරෙහිව රජයේ සාක්ෂිකරුවකු ලෙස ඉදිරිපත් වනු ඇතැයි අපේක්ෂා කළ නොහැකි බැවින් ඇයව සැකකාරියක ලෙස නම් කිරීම කෙරෙහි අවධානය යොමු වී ඇති බව අතිරේක සොලිසිටර් ජනරාල්වරයා ප්රකාශ කළේය.
මෙම සංචාරය පුද්ගලික එකක් බවත් එය නිල රාජ්ය තාන්ත්රික අවශ්යතාවක් මත සිදු නොවූවක් බවත් විමර්ශනවලදී තහවුරු වී ඇති බව නීතිපති පාර්ශ්වය අවධාරණය කළේය. වුල්වර්හැම්ප්ටන් විශ්වවිද්යාලය ලබා දුන් බව කියන ආරාධනාව සම්බන්ධයෙන් ද සැකයක් පවතින බවත් විනාඩි 50ක පමණ කාලයක් පැවති වැඩසටහනක් වෙනුවෙන් මෙලෙස රුපියල් ලක්ෂ 166ක මහජන මුදල් වැය කිරීම බරපතළ තත්ත්වයක් බවත් එහිදී සඳහන් විය. කොටුව මහේස්ත්රාත් ඉසුරු නෙත්තිකුමාර මහතා ප්රකාශ කළේ පළමු සැකකාර රනිල් වික්රමසිංහ මහතාට එරෙහිව අධිචෝදනා ගොනු කිරීමට ප්රමාණවත් සාක්ෂි පවතින බවයි. හිටපු ජනාධිපති ලේකම් සමන් ඒකනායක මහතාට එරෙහිව ද වංචනික ලෙස මුදල් ගෙවීම් කිරීම සම්බන්ධයෙන් විමර්ශන පවත්වන ලෙස මහේස්ත්රාත්වරයා නියෝග කළේය. නඩුව නැවත ජූලි 08 වනදා කැඳවීමට නියමිතය.
