මැදපෙරදිග පවතින යුදමය වාතාවරණය හමුවේ ඇති වී තිබෙන බලශක්ති අනාරක්ෂිතභාවයට පිළියම් ලෙස, මැලේසියාවේ සතු අතිරික්ත ඉන්ධන තොග ඔස්ට්රේලියාවට ලබා දීමට ප්රමුඛතාව ලබා දෙන බව මැලේසියානු අග්රාමාත්ය අන්වර් ඉබ්රාහිම් (Anwar Ibrahim) ප්රකාශ කළේය. මැලේසියාවේ පරිපාලන අගනුවර වන පුට්රජායා හිදී ඔස්ට්රේලියානු අග්රාමාත්ය ඇන්තනි ඇල්බනීස් (Anthony Albanese) සමඟ පැවති සාකච්ඡාවකින් අනතුරුව ඔහු මේ බව තහවුරු කළේය. මැලේසියාවේ රජයට අයත් ‘පෙට්රෝනාස්’ බලශක්ති සමාගම හරහා මෙම සැපයුම් සිදු කිරීමට නියමිත අතර, දෙරට අතර පවතින මිත්රත්වය මත මෙම තීරණය ගත් බව අන්වර් ඉබ්රාහිම් වැඩිදුරටත් සඳහන් කළේය.
මෙම ගනුදෙනුවට සමගාමීව, මැලේසියාවට අවශ්ය මිනරල් පොස්පේට් (Mineral phosphates) ඔස්ට්රේලියාවෙන් ලබා ගැනීමටත්, ඒ වෙනුවට ඔස්ට්රේලියාවට අවශ්ය යූරියා (Urea) ලබා දීමටත් දෙරට අතර එකඟතාවක් ඇති වී තිබේ. සිංගප්පූරුව සහ බෲනායි රාජ්යයේ සංචාරය කිරීමෙන් අනතුරුව ඇන්තනි ඇල්බනීස් මැලේසියාවට පැමිණියේ තම රටට අවශ්ය ආහාර සහ බලශක්ති සැපයුම තහවුරු කර ගැනීමේ අරමුණිනි.
ඔස්ට්රේලියානු අග්රාමාත්යවරයා මෙහිදී අනාවරණය කළේ බෲනායි රාජ්යයෙන් සහ දකුණු කොරියාවෙන් ඩීසල් ලීටර් මිලියන 100ක අතිරේක තොගයක් ලබා ගැනීමට දැනටමත් පියවර ගෙන ඇති බවයි. ඔස්ට්රේලියාවේ මූලෝපායික රක්ෂිත බලතල යටතේ (Strategic reserve powers) සිදු කරන ලද මෙම ඉන්ධන ආනයනයන් හරහා එරට පවතින ඉන්ධන හිඟය මකා ගැනීමට බලාපොරොත්තු වේ. ඔස්ට්රේලියාවේ විශාලතම පිරිපහදුවක ඇති වූ ගින්න සහ ගෝලීය යුද වාතාවරණය හමුවේ මෙම නව බලශක්ති සබඳතා ඔස්ට්රේලියාවට ඉතා තීරණාත්මක වී තිබේ.
