English 
රටේ ඛනිජ සම්පත් කළමණාකරණය කිරීම භූ විද්‍යා හා පතල් කාර්යාංශයේ වගකීමක්- ඇමැති මහින්ද කියයි
අපේ මහපොළවේ ඇති ඛනිජ සම්පත් විදිමත් පරිදි කළමනාකරණය කර ගනිමින් ඒවා රජය විසින් ක්‍රියාත්මක කර ඇති සංවර්ධන ව්‍යාපෘති සඳහා හිගයකින් තොරව ලබා දීමේ වගකීම භූ විද්‍යා හා පතල් කාර්යාංශයේ මුලික වගකීම බව පරිසර අමාත්‍ය මහින්ද අමරවීර මහතා පවසයි.
අමාත්‍යවරයා මෙම අදහස් පළ කළේ භූ විද්‍යා හා පතල් කාර්යාංශයේ වසර 20කට වඩා සේවය කළ නිලධාරින්ගේ සේවය ඇගයීමේ රන් තිළිණ ප්‍රදානය කිරීමේ උත්සවයට සහභාගි වෙමිනි.
මෙහිදී වැඩි දුරටත් අදහස් දැක්වු අමාත්‍යවරයා ” අපි උත්සාහ කරන්න ඕනෑ රටක් වශයෙන් තනිවම නැගී සිටින්නට. අපිට ඛනිජ සම්පත් විශාල ප්‍රමාණයක් තිබෙනවා. ඒ සියල්ල විදිමත්ව කළමනාකරණය කරන්නට අවශ්‍යයි. කළ යුතුව තිබෙන්නේ ජාවාරම්කාරයින්ට මේ සම්පත් ගසා කන්නට ඉඩ දීම නොවෙයි. ඒ සඳහා මම වැඩ පිළිවෙළක් සකස් කර තිබෙනවා. මිහිමවට කන් දෙමු යනුවෙන් පුලුල් වැඩ පිළිවෙළක් අපි ආරම්භ කරනවා. එමගින් මේ සියලු ඛනිජ සම්පත් රටේ සංවර්ධනයට ඵලදායි ලෙස යොදා ගැනීමට පියවර ගන්නවා යැයි ද අමාත්‍යවරයා සඳහන් කළේය.
භූ විද්‍යා හා පතල් කාර්යාංශය විසින් වාර්ෂිකව මෙම රන් තිළිණ ප්‍රදානොත්සවය පවත්වන අතර මෙවර නිලධාරින් ඇතුලු සේවක මණ්ඩලයේ 28 දෙනෙකුට රන් පදක්කම් පිිරිනමනු ලැබීය. මෙම රන් තිළිණ ප්‍රදානය කිරීම අමාත්‍ය මහින්ද අමරවීර, අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ, හා එම කාර්යාංශයේ සභාපති අනුර වල්පොළ යන මහත්වරුන්ගේ සහභාගිත්වයෙන් සිදු කෙරිණි.