නුවරඑළිය ග්රෙගරි වැවේ (Gregory Lake) සංචාරකයන් ප්රවාහනය කිරීම සඳහා නුවරඑළිය මහ නගර සභාව මඟින් අනුමත කර ඇති උපරිම එන්ජින් ධාරිතාවය ඉක්මවා යමින්, අධි බලැති බෝට්ටු ධාවනය කිරීම හේතුවෙන් සංචාරකයන්ගේ ජීවිතවලට දැඩි අවදානමක් මෙන්ම වැවේ පාරිසරික පද්ධතියට විශාල හානියක් සිදුව ඇති බව ජාතික ජන බලවේගයේ (NPP) නුවරඑළිය දිස්ත්රික් පාර්ලිමේන්තු මන්ත්රී සහ නුවරඑළිය දිස්ත්රික් සම්බන්ධීකරණ කමිටුවේ සභාපති මංජුල සුරවීරආරච්චි මහතා පවසයි.
ග්රෙගරි වැවේ සංචාරක සේවා සඳහා එන්ජින් ධාරිතාවය 40ක් (40 HP) වන බෝට්ටු සඳහා පමණක් නගර සභා අනුමැතිය හිමිව තිබුණ ද, මේ වන විට ඇතැම් පාර්ශ්ව විසින් එන්ජින් ධාරිතාවය 115ක් (115 HP) වන අධි බලැති බෝට්ටු කිහිපයක් නීති විරෝධී ලෙස ධාවනයට එක්කර ඇති බව මන්ත්රීවරයා පෙන්වා දෙයි. මංජුල සුරවීරආරච්චි මහතා මේ බව කියා සිටියේ හැටන් – බගවන්තලාව ප්රධාන මාර්ගයේ ලංගම (SLTB) සහ පෞද්ගලික බස් රථ ඒකාබද්ධ සේවාවක් (Joint Bus Service) ලෙස පවත්වාගෙන යාම සම්බන්ධයෙන් බගවන්තලාව නගරයේ පැවති පෞද්ගලික බස් රථ හිමියන් දැනුවත් කිරීමේ විශේෂ සාකච්ඡාවකට සහභාගී වෙමිනි.
මෙහිදී වැඩිදුරටත් අදහස් දැක්වූ මන්ත්රීවරයා සඳහන් කළේ, දැනටමත් ග්රෙගරි වැවේ කුඩා වපසරියට ඔරොත්තු නොදෙන තරමට බෝට්ටු 133ක් ධාවනය සඳහා එක්කර ඇති පසුබිමක, තවත් බෝට්ටු ප්රමාණයක් සඳහා නුවරඑළිය මහ නගර සභාවෙන් අනුමැතිය ඉල්ලා ඇති බවයි. ඇතැම් බෝට්ටුකරුවන් තමන්ගේ බෝට්ටු ජෙට් ස්කී (Jet Ski) ධාවනය කරන්නාක් මෙන් ඉතා අනාරක්ෂිත ලෙස ධාවනය කරන බවත්, ඉදිරියේදී මේවා දැඩි ලෙස නියාමනය කර ආරක්ෂිත බෝට්ටු සේවාවක් ස්ථාපිත කරන බවත් ඔහු අවධාරණය කළේය.
