ශ්රී ලංකාවේ ප්රමුඛ පෙළේ කුකුළු මස් සහ ආශ්රිත නිෂ්පාදන ආයතනයක් වන බයිරහා ෆාම්ස් පීඑල්සී (Bairaha Farms PLC) සමාගම, ආයතනික මට්ටමින් හරිතාගාර වායු (Greenhouse Gas – GHG) විමෝචනය පිළිබඳ ඉහළම සහ දැඩිම ප්රමිතිය නියෝජනය කරන “Reasonable Level of Assurance” (සාධාරණ සහතික කිරීමේ මට්ටම) සහිත ISO 14064 ජාත්යන්තර සහතිකය දිනා ගනිමින් මෙරට තිරසාර ව්යාපාරික ක්ෂේත්රයේ සුවිශේෂී සන්ධිස්ථානයක් සලකුණු කර තිබේ. ISO 14064 රාමුව යටතේ ලබාදෙන සහතික කිරීමේ මට්ටම් දෙක අතුරින් වඩාත් විද්යාත්මක සහ දැඩිම පරික්ෂාවන්ට ලක් කෙරෙන මෙම ඉහළම සහතිකය දිනාගැනීම මඟින්, බයිරහා සමාගම සිය කාබන් පියසටහන (Carbon Footprint) වාර්තා කිරීමේ පූර්ණ නිරවද්යතාව, විනිවිදභාවය සහ අඛණ්ඩතාව මැනවින් තහවුරු කර ඇත.
මෙමඟින් බයිරහා ආයතනයේ හරිතාගාර වායු ප්රකාශනය, ආයතනික මට්ටමින් හරිතාගාර වායු විමෝචනය සහ ඉවත් කිරීම් ප්රමාණීකරණය කිරීම සහ වාර්තා කිරීම සඳහා වන ජාත්යන්තරව පිළිගත් ISO 14064-1:2018 ප්රමිතීන්ට මුළුමනින්ම අනුකූලව සකස් කර ඇති බවත්, එය ISO 14064-3:2019 ප්රමිතියට අනුව ස්වාධීන විගණනයකට ලක් කර ඇති බවත් තහවුරු වේ. පරිසර අමාත්යාංශය යටතේ ක්රියාත්මක වන ශ්රී ලංකා දේශගුණික අරමුදල (Sri Lanka Climate Fund) විසින් මෙම සහතිකය නිකුත් කර ඇති අතර, පරිසර අමාත්යාංශයේ සෘජු අධීක්ෂණය යටතේ මෙම ගෞරවනීය තත්ත්වය ලබාගත් මෙරට එකම කුකුළු පාලන ව්යාපාරික සමාගම බවට බයිරහා ෆාම්ස් පත්ව සිටියි.
මෙම නිල සහතිකය ප්රදානය කිරීම 2026 වසරේ මුල් භාගයේදී පරිසර අමාත්යාංශයේ ලේකම් කාර්යාලයේදී සිදුකෙරුණු අතර, පරිසර අමාත්යාංශයේ ලේකම් සහ ශ්රී ලංකා දේශගුණික අරමුදලේ සභාපති කේ. ආර්. උඩුවාවල මහතා විසින් එය නිල වශයෙන් භාර දෙනු ලැබීය. මෙම අවස්ථාවට ශ්රී ලංකා දේශගුණික අරමුදලේ වැඩබලන ප්රධාන විධායක නිලධාරිනී හර්ෂණී අබේරත්න, සහකාර ව්යාපෘති සහ ගුණාත්මකභාවය පිළිබඳ කළමනාකාරිනී යශෝධා ලේකම්ගේ සහ ව්යාපෘති විධායක මධුභාෂිණී ගුණතිලක යන මහත්ම මහත්මීන් ඇතුළු උසස් නිලධාරීහු පිරිසක් සහභාගී වූහ.
