ග්රීසියේ මෙතෙක් සිදුවූ දරුණුතම දුම්රිය අනතුරෙන් තම 19 හැවිරිදි දියණිය අහිමි වූ මරියා කරිස්ටියානෝ (Maria Karystianou) නමැති වෛද්යවරිය, වත්මන් අග්රාමාත්ය කිරියාකොස් මිට්සොටාකිස්ගේ (Kyriakos Mitsotakis) රජයට එරෙහිව නව දේශපාලන පක්ෂයක් ආරම්භ කර තිබේ.’ප්රජාතන්ත්රවාදයේ අපේක්ෂාව’ (Hope for Democracy) ලෙස නම් කර ඇති මෙම නව පක්ෂය ඇය විසින් නිල වශයෙන් ප්රකාශයට පත් කරනු ලැබුවේ ග්රීසියේ තෙසලෝනිකි (Thessaloniki) නුවර පැවැති විශේෂ උත්සවයකදීය.වසර 2023 පෙබරවාරි මාසයේදී ග්රීසියේ ‘ටෙම්පි’ (Tempi) ප්රදේශයේදී සිදුවූ මෙම මාරක දුම්රිය අනතුරෙන් පුද්ගලයන් 57 දෙනෙකු ජීවිතක්ෂයට පත්වූ අතර, ඉන් මරියා කරිස්ටියානෝගේ දියණිය වූ මාර්ති ද (Marthi) මියගියාය. ඉන් අනතුරුව ග්රීසියේ දේශපාලන පන්තිය කෙරෙහි ජනතාව තුළ ඇති වූ දැඩි නොසතුට සහ බලාපොරොත්තු සුන්වීම පදනම් කරගනිමින්, වින්දිතයන් වෙනුවෙන් සාධාරණය ඉල්ලා රට පුරා දියත් වූ දැවැන්ත විරෝධතාවල ප්රධාන නායිකාවක ලෙස ඇය කැපී පෙනුණි.අදාළ අනතුර සම්බන්ධයෙන් දුම්රිය ස්ථානාධිපතිවරුන් සහ කළමනාකාරීත්වයේ නිලධාරීන් ඇතුළු 36 දෙනෙකුට එරෙහිව මේ වන විට අධිකරණ ක්රියාමාර්ග දියත් වෙමින් පවතින නමුත්, කිසිදු දේශපාලනඥයෙකුට එරෙහිව මෙතෙක් නඩු පවරා නොමැත. මේ හේතුවෙන් වත්මන් රජය විසින් සත්යය වසන් කිරීමට (Cover-up) උත්සාහ කරන බවට වින්දිතයන්ගේ ඥාතීන් චෝදනා කරන අතර රජය එම චෝදනා ප්රතික්ෂේප කරයි.
ග්රීසියේ ඉදිරි මාස 12 ඇතුළත මහ මැතිවරණයක් පැවැත්වීමට නියමිතව ඇති වටපිටාවක, මරියා කරිස්ටියානෝ විසින් පිහිටුවන ලද මෙම නව පක්ෂය එරට පාර්ලිමේන්තුව නියෝජනය කිරීමට තරම් ප්රබල මහජන ආකර්ෂණයක් සහ දේශපාලන මත විමසුම්වල ඉහළ ප්රතිශතයක් දිනාගනු ඇතැයි දේශපාලන විචාරකයෝ විශ්වාසය පළ කරති.
