ඉදිරි අගෝස්තු අග වන විට මෙරට ඖෂධ ගැටළුව බොහෝ දුරට විසඳෙන බව සෞඛ්ය අමාත්ය ආචාර්ය කෙහෙලිය රඹුක්වැල්ල මහතා පවසයි.
මේ වන විට ආර්ථික හා දේශපාලන අර්බුදයන් සමනය වෙමින් රට යළි සාමාන්ය තත්ත්වයට පත් වෙමින් පවතින බව අමාත්යවරයා පෙන්වා දෙයි.
අමාත්යවරයා මේ බව පැවසුවේ ජපන් ජනතාව විසින් ලබාදෙන ඇමෙරිකානු ඩොලර් මිලියන 1.5 ක ඖෂධ හා උපකරණයන්හි පළමු තොගය අද (28) නිල වශයෙන් ශ්රී ලංකාවේ ජපන් තානාපති මිසුකොෂි හිදෙකි මහතා (Mizukoshi Hideaki) හා යුනිසෙෆ් (UNICEF) සංවිධානයේ නියෝජිත පිරිස සෞඛ්ය අමාත්යාංශය වෙත භාර ගැනීමේ අවස්ථාවේදීය.
ශ්රී ලංකාව මුහුණ දුන් අර්බුදයෙන් ගොඩ ඒම සඳහා ලොව පුරා මිත්ර රටවල් සියල්ල පාහේ සහයෝගය දැක්වූ බවත් එම රටවල පරිත්යාගශීලීත්වයට ස්තූතිවන්ත වන බවත් සෞඛ්ය අමාත්යවරයා මෙහිදී කීය. විශේෂයෙන් කලාපයේ සියලු රටවල් වඩා මිත්රශීලීත්වයකින් සහයෝගය ලබා දුන් බවත් ඒ අතරින් ජපානය ඉහළ මිත්රශීලීත්වයක් ලබාදුන් බවත් ඒ මහතා කීය. විශේෂයෙන් කොවිඩ් ව්යසන සමයේදී මෙන්ම වත්මන් අර්බුදකාරී තත්වයන් හමුවේ ලබාදුන් සහයෝගය අතිශය වැදගත් බවත් මේ වන විට ජාත්යන්තර මූල්ය අරමුදල සමඟ සිදු වෙමින් පවතින සාකච්ඡා සාර්ථක බවත් හෙතෙම පෙන්වා දුන්නේය.
ඉකුත් සතිය තුළ සංචාරකයන්ගේ පැමිණීම පෙර වකවානුවට වඩා පැහැදිලි ලෙස වර්ධනය වී ඇතැයිද ඉදිරි කාලය සියල්ල යහපත් මට්ටමකට වර්ධනය වනු ඇතැයිද මෙහිදී පෙන්වා දුන් අමාත්යවරයා සෑම කළු වලාවකම රිදී රේඛාවක් තිබෙන්නා සේ මෙම ව්යසනයන් හමුවේ ද සුවිශේෂී ජයග්රහණයක් ඇතිවිය හැකි යැයිද පැවසීය.
මෙම අවස්ථාව සඳහා සෞඛ්ය අමාත්යාංශයේ ලේකම් ජනක චන්ද්රගුප්ත , සෞඛ්ය සේවා අධ්යක්ෂ ජනරාල් වෛද්ය අසේල ගුණවර්ධන, සෞඛ්ය අමාත්යංශයේ ප්රධාන සම්බන්ධිකාරක කොවිඩ් සහ ඖෂධ ප්රදාන කටයුතු හා වෛද්ය තාක්ෂණික සේවා අධ්යක්ෂ වෛද්ය අන්වර් හම්දානි යන මහත්වරුන්ද මේ අවස්ථාවට සහභාගි වූහ.
