වොෂින්ටන් ඩී.සී. හි පිහිටි ඓතිහාසික දෙවන ලෝක යුධ ස්මාරකයට (World War II Memorial) හානි කිරීම සම්බන්ධයෙන් 41 හැවිරිදි මෙලිසා ෆැරිස් (Melissa Farris) නමැති කාන්තාව අත්අඩංගුවට ගෙන ඇයට එරෙහිව බරපතළ චෝදනා දෙකක් ගොනු කර තිබේ.
එක්සත් ජනපද දේපළවලට හානි කිරීම සහ රණවිරු ස්මාරක විනාශ කිරීම යන චෝදනා යටතේ කොලොම්බියා දිස්ත්රික්කයේ එක්සත් ජනපද නීතිපති ජෙනීන් පිරෝ (Jeanine Pirro) විසින් ඇයට එරෙහිව නඩු පවරා ඇත. මෙම චෝදනා සඳහා වසර 10 දක්වා සිරදඬුවම් නියම විය හැක.
මෙම ස්මාරකයේ දිය උල්පතට සබන් යොදා පෙණ පිරවීමට කටයුතු කර ඇති අතර, එහි තාප්ප මත රතු සහ කොළ පැහැති සායම්වලින් “Clean hands dirty $” ලෙස ලියා හානි සිදුකර ඇත. මීට සති කිහිපයකට පෙර ආසන්නයේ පිහිටි ලින්කන් ස්මාරකයේ ‘Reflecting Pool’ ජලාශයට හානි සිදුකිරීම සම්බන්ධයෙන් වූ නඩුවක් ඉවත් කරගැනීම හේතුවෙන් ජනාධිපති ඩොනල්ඩ් ට්රම්ප් සහ නීතිපති ජෙනීන් පිරෝ අතර දැඩි මතභේදාත්මක තත්ත්වයක් හටගෙන තිබිණි. එම සිදුවීමෙන් පසු මෙම අත්අඩංගුවට ගැනීම සිදුවී ඇත.
