නිරිත දිග මෝසම් කාලගුණය (South-West Monsoon) ශ්රී ලංකාව හරහා ක්රමයෙන් ස්ථාපිත වෙමින් පැවතීම හේතුවෙන් අද (20) දිනයේ දිවයිනේ ප්රදේශ රැසකට විටින් විට වැසි හෝ ගිගුරුම් සහිත වැසි ඇතිවිය හැකි බව කාලගුණ විද්යා දෙපාර්තමේන්තුව නිවේදනය කරයි.
එම නිවේදනයට අනුව බස්නාහිර, සබරගමුව, වයඹ පළාත්වලත් ගාල්ල, මාතර, මහනුවර සහ නුවරඑළිය දිස්ත්රික්කවලත් ඇතැම් ස්ථානවලට මිලිමීටර් 50ට වැඩි තරමක තද වැසි ඇති විය හැක. මීට අමතරව උතුරු පළාත, අනුරාධපුරය සහ හම්බන්තොට දිස්ත්රික්කවල වැසි වාර කිහිපයක් ද, ඌව පළාත, මඩකලපුව සහ අම්පාර දිස්ත්රික්කවල සන්ධ්යා කාලයේදී ස්ථාන ස්වල්පයක වැසි ද බලාපොරොත්තු විය හැකියි. මධ්යම කඳුකරයේ බටහිර බෑවුම්වල මෙන්ම උතුරු, උතුරු-මැද, වයඹ සහ දකුණු පළාත්වල පැයට කිලෝමීටර් 30-40ක පමණ තද සුළං ද ඇතිවිය හැකි බැවින් අකුණු සහ තද සුළං අනතුරු පිළිබඳව අවධානයෙන් පසුවන ලෙස ජනතාවගෙන් ඉල්ලා සිටියි.
පවතින අයහපත් කාලගුණය හේතුවෙන් පසුගිය මැයි 10 වැනිදා සිට මේ දක්වා දිස්ත්රික්ක 14ක පවුල් 1,611කට අයත් පුද්ගලයන් 5,343 දෙනෙකු පීඩාවට පත්ව ඇති බව ආපදා කළමනාකරණ මධ්යස්ථානය (DMC) තහවුරු කරයි.
මෙම ආපදා තත්ත්වය නිසා මේ වන විට මරණ 02ක් සිදු වී ඇති අතර පුද්ගලයන් 01 අයෙකු තුවාල ලබා තිබේ. නිවාස සම්බන්ධයෙන් පූර්ණ නිවාස හානි 06ක් සහ අර්ධ නිවාස හානි 226ක් වාර්තා වේ. එමෙන්ම පවතින අධික වර්ෂාව හේතුවෙන් මේ වන විට වාරි ජලාශ ගණනාවක් වාන් දමමින් පවතී.
ත්රිකුණාමලයේ සිට කන්කසන්තුරය, මන්නාරම, පුත්තලම, කොළඹ, ගාල්ල සහ හම්බන්තොට හරහා පොතුවිල් දක්වා වන වෙරළට ඔබ්බෙන් වූ මුහුදු ප්රදේශ විටින් විට රළු විය හැක. විශේෂයෙන් මන්නාරම සිට පොතුවිල් දක්වා මුහුදු රළ උස මීටර් 2.0 – 2.5ක් දක්වා ඉහළ යා හැකි මුත්, ඒවා ගොඩබිමට පැමිණෙන රළ නොවන බව කාලගුණ විද්යා දෙපාර්තමේන්තුව වැඩිදුරටත් සඳහන් කරයි.
