කොළඹ නගරයේ පවතින දැඩි රථවාහන තදබදයට පිළියමක් ලෙස හඳුන්වා දීමට නියමිත “මෙට්රෝ බස්” (Metro Bus) සේවාව සඳහාම වෙන්වූ නවීන පහසුකම් සහිත බස් ඩිපෝවක් ස්ථාපිත කිරීමට රජය තීරණය කර තිබේ. මෙම ව්යාපෘතියේ ඉදිකිරීම් කටයුතු ඉදිරි මාස තුන ඇතුළත අවසන් කර මෙහෙයුම් කටයුතු ආරම්භ කරන ලෙස අදාළ බලධාරීන්ට උපදෙස් ලැබී ඇත.
මෙම විශේෂිත ඩිපෝව හරහා මෙට්රෝ බස් රථ නඩත්තුව, ඉන්ධන පිරවීම සහ කාලසටහන් නියාමනය මධ්යගතව සිදු කිරීමට සැලසුම් කර තිබේ. කොළඹ සහ තදාසන්න ප්රදේශ ඉලක්ක කර ගනිමින් ධාවනය වන මෙම බස් රථ සේවාව වඩාත් විධිමත් සහ කාර්යක්ෂම ලෙස පවත්වාගෙන යාම සඳහා මෙවැනිම ඩිපෝවක් තිබීමේ අවශ්යතාව ප්රවාහන අංශ විසින් පෙන්වා දී තිබුණි.
නව ඩිපෝව ස්ථාපිත කිරීමත් සමඟ මෙට්රෝ බස් සේවාවට අදාළ තාක්ෂණික පහසුකම් සහ සේවක සුබසාධන කටයුතු ද ඉහළ නැංවීමට නියමිතය. පොදු ප්රවාහන සේවාව නවීකරණය කිරීමේ රජයේ වැඩපිළිවෙළ යටතේ ක්රියාත්මක මෙම ව්යාපෘතිය මගින් මගී ජනතාවට වඩාත් ගුණාත්මක සහ විශ්වාසනීය ප්රවාහන අත්දැකීමක් ලබා දීමට අපේක්ෂා කෙරේ.
