ශ්රී ලංකන් ගුවන් සමාගමේ හිටපු ප්රධාන විධායක නිලධාරී කපිල චන්ද්රසේන මහතාගේ මරණය සම්බන්ධයෙන් මේ මොහොතේ ස්ථිර ප්රකාශයක් සිදුකිරීමට නොහැකි බව මහජන ආරක්ෂක අමාත්ය ආනන්ද විජේපාල මහතා පවසයි. ඊයේ (08) පස්වරුවේ මාධ්ය වෙත අදහස් දක්වමින් අමාත්යවරයා සඳහන් කළේ, එම මරණය පිළිබඳව පශ්චාත් මරණ පරීක්ෂණය පැවැත්වෙන අතර ඉන් අනතුරුව අධිකරණ වෛද්ය නිලධාරීන් ඒ පිළිබඳව නිවැරදි කරුණු පැහැදිලි කරනු ඇති බවයි.
කපිල චන්ද්රසේන මහතාගේ මරණය සැකකටයුතු බවට පොලිසිය විසින් අධිකරණයට කරුණු වාර්තා කර ඇති අතර, ඒ අනුව අධිකරණ වෛද්යවරුන් පස් දෙනෙකුගෙන් යුත් වෛද්ය මණ්ඩලයක් මගින් පශ්චාත් මරණ පරීක්ෂණය පවත්වා වාර්තාවක් ඉදිරිපත් කරන ලෙස කොටුව මහේස්ත්රාත් පසන් අමරසේන මහතා නියෝග කර තිබේ. ඇප කොන්දේසි කඩ කිරීම හේතුවෙන් අධිකරණය විසින් යළි අත්අඩංගුවට ගැනීමට වරෙන්තු නිකුත් කර තිබූ පසුබිමක, කොල්ලුපිටිය ප්රදේශයේ නිවසක තිබී ඔහුගේ සිරුර හමු විය. සිද්ධිය සම්බන්ධයෙන් පොලිසිය මේ වන විටත් විශේෂ විමර්ශන ආරම්භ කර ඇති අතර, මරණයට හේතුව පිළිබඳ අවසන් නිගමනය පශ්චාත් මරණ පරීක්ෂණ වාර්තාවෙන් පසුව ප්රකාශයට පත් කිරීමට නියමිතය.
