ශ්රී ලංකාවේ දකුණු මුහුදු තීරයේදී මුහුදුබත් වූ ඉරාන නාවික හමුදාවට අයත් ‘IRIS Dena’ යුද නෞකාව සම්බන්ධයෙන් වන්දි ඉල්ලා සිටීමේ හැකියාවක් නොමැති බව ශ්රී ලංකා රජය නිල වශයෙන් ප්රකාශ කර තිබේ. ජාත්යන්තර නීතියට අනුව යුද නෞකාවලට එරෙහිව වන්දි හිමිකම් පෑමට ඇති සීමාවන් සහ මේ දක්වා නෞකාවෙන් සිදුවූ පරිසර දූෂණයක් තහවුරු වී නොමැති වීම මෙයට හේතුව බව සමුද්රීය පරිසර ආරක්ෂණ අධිකාරියේ (MEPA) සභාපති සමන්ත ගුණසේකර මහතා පවසා ඇත.
ඉන්දියාවේ පැවැති ජාත්යන්තර නාවික සමාලෝචනයකට සහභාගී වී ආපසු යමින් සිටියදී, පසුගිය මාර්තු 4 වැනිදා ගාල්ලට නාවික සැතපුම් 40-50ක් පමණ දකුණින් වූ ශ්රී ලංකාවට අයත් අනන්ය ආර්ථික කලාපය (EEZ) තුළදී ඇමරිකානු සබ්මැරීනයක ප්රහාරයකින් මෙම නෞකාව ගිලී ගියේය. ජාත්යන්තර නීතියට අනුව යුද නෞකාවන් ‘නීත්යානුකූල යුද ඉලක්ක’ ලෙස සැලකෙන බැවින් සහ මෙම සිදුවීම ශ්රී ලංකාවේ මුහුදු සීමාවෙන් (නාවික සැතපුම් 12 සීමාවෙන්) පිටත සිදුවූවක් නිසා නාවික යුධ නීති මගින් මෙය පාලනය වේ. පසුගිය දිනවල හිකඩුව, දොඩන්දුව වැනි වෙරළ තීරයන්ට තෙල් පැල්ලම් සහ සුන්බුන් ගොඩගැසීම හේතුවෙන් ජනතාව අතර දැඩි කනස්සල්ලක් ඇති වුවද, එම සිදුවීම් මෙම ඉරාන නෞකාව සමඟ සෘජු සම්බන්ධයක් ඇති බවට මෙතෙක් විද්යාත්මකව තහවුරු වී නොමැති බව ද බලධාරීන් අවධාරණය කරයි.
