ආහාර සුරක්ෂිතතාව ඇති කිරීම සහ ග්රාමීය ආර්ථිකය ශක්තිමත් කිරීම රජයේ ප්රධාන වගකීම බවත්, කුමන ස්වාභාවික ආපදා හෝ අභියෝග පැමිණියද රට තුළ ආහාර හිඟයක් ඇති නොවන බවත් කෘෂිකර්ම, පශු සම්පත්, ඉඩම් සහ වාරිමාර්ග අමාත්ය කේ.ඩී. ලාල්කාන්ත මහතා ප්රකාශ කළේය.
අමාත්යවරයා මේ බව පැවසූයේ, කුඩා පරිමාණ කෘෂි ව්යාපාර හවුල්කාරීත්ව වැඩසටහන (SAPP) යටතේ රටකජු නිෂ්පාදක ගොවි සංවිධාන වෙත ට්රැක්ටර් බෙදාදීමේ අවස්ථාවට ගොවිජන මන්දිරයේදී එක්වෙමිනි. මෙම ව්යාපෘතිය ගලේවල, නාඋල, මහියංගණය, රිදීමාලියද්ද සහ කොබෙයිගනේ යන ප්රදේශවල ක්රියාත්මක වන අතර, දේශීය රටකජු නිෂ්පාදනය ඉහළ නංවා ආනයන සීමා කිරීම අරමුණයි.
ආනයන ආදේශන නිෂ්පාදනවලට ප්රමුඛතාව ලබා දීම වැදගත් වන අතර, ගොවීන් ජාතික සම්පතක් ලෙස සලකමින් රජය පොහොර සහනාධාර ඇතුළු විශාල ආයෝජනයක් සිදු කරයි.
ගොවීන් ද නිෂ්පාදන මිලදී ගන්නා පාරිභෝගිකයාගේ යහපත පිළිබඳවද සැලකිලිමත් විය යුතු අතර, සාධාරණ හාල් මිලක් පවත්වාගෙන යාම වැදගත්ය.
රටක සිදුවන ධනාත්මක සංවර්ධන කටයුතු සමාජගත කිරීමේ අවශ්යතාවයද අමාත්යවරයා මෙහිදී පෙන්වා දුන්නේය.
කෘෂිකර්ම සහ පශු සම්පත් නියෝජ්ය අමාත්ය නාමල් කරුණාරත්න මහතා අදහස් දක්වමින් පැවසූයේ අඩු භූමියකින් වැඩි අස්වැන්නක් ලබා ගැනීමට රජය වැඩපිළිවෙළක් ක්රියාත්මක කරන බවත්, පසුගිය වසරේ මුං ඇට ආනයනය නතර කිරීමට හැකි වූවා සේ රටකජු ආනයනය නතර කිරීම සඳහා පියවර ගන්නා බවත්ය. නිෂ්පාදන සඳහා වෙළෙඳපොළ සහතික කිරීම සහ අගය එකතු කිරීමේ වැඩසටහන් ක්රියාත්මක කරන බව නියෝජ්ය අමාත්යවරයා වැඩිදුරටත් සඳහන් කළේය.මෙම අවස්ථාවට අමාත්යාංශයේ ලේකම් ඩී.පී. වික්රමසිංහ මහතා ඇතුළු නිලධාරීන් පිරිසක් සහභාගී වූහ.
