යුක්රේනය විසින් රුසියානු භූමියේ ගැඹුරු ප්රදේශ ඉලක්ක කරගෙන දියත් කරන නිර්භීත ඩ්රෝන ප්රහාර මාලාව හේතුවෙන් රුසියාවේ ඉන්ධන සැපයුම් දාමය දැඩි බිඳවැටීමකට ලක්ව තිබේ. පසුගිය සතියේ එක් රාත්රියක පමණක් රුසියානු ප්රදේශ 12ක් පුරා ඩ්රෝන යානා 660ක් මගින් එල්ල කළ ප්රහාර හමුවේ, රුසියාවේ තෙල් පිරිපහදු මධ්යස්ථාන, ඉන්ධන ගබඩා පර්යන්ත සහ අවි නිෂ්පාදනාගාර ඉලක්ක විය. මෙම ප්රහාරවල බලපෑම මේ වන විට මොස්කව් අගනුවර දක්වාම පැතිර ගොස් ඇති අතර, රියදුරන් දින ගණනාවක් පුරා ඉන්ධන සෙවීමේ අරගලයක නිරත වේ. ක්රිමියානු අර්ධද්වීපයේ සිල්ලර ඉන්ධන අලෙවිය සම්පූර්ණයෙන්ම අත්හිටුවා ඇති අතර, එහි හදිසි තත්ත්වයක් ද ප්රකාශයට පත් කර තිබේ.
වසර ගණනාවක් තිස්සේ යුක්රේනයේ විදුලිබල පද්ධතිය ඉලක්ක කර ප්රහාර එල්ල කිරීමෙන් යුක්රේන ජනතාවගේ මනෝභාවය බිඳ දැමීමට රුසියාව උත්සාහ දැරුවද, වත්මන් යුක්රේන ඩ්රෝන ප්රහාර මගින් එම ප්රතිප්රහාර එල්ල කිරීම ජාත්යන්තර දේශපාලන කරළියේ දැඩි අවධානයට ලක්ව ඇත. මෙම තත්ත්වය හමුවේ අමෙරිකානු ජනාධිපති ඩොනල්ඩ් ට්රම්ප් මහතාගේ ස්ථාවරයේද වෙනසක් දක්නට ලැබෙන අතර, ඔහු ව්ලොඩිමීර් සෙලෙන්ස්කි මහතා “නිර්භීත” නායකයෙකු ලෙස හඳුන්වා දී තිබේ. කෙසේ වෙතත්, ඉන්ධන අර්බුදය පමණක් මෙම යුද්ධය අවසන් කිරීමට ප්රමාණවත් නොවන බව විචාරකයෝ පවසති. රුසියානු භූමිය තුළ මිලියනයකට අධික ජීවිත හානි සහ දේශපාලනමය වශයෙන් තීරණාත්මක තත්ත්වයන් මත, පුටින් මහතා කිසිදු පසුබැසීමක් සිදු නොකරනු ඇති බවත්, අර්ධ ජයග්රහණයක් වෙනුවට සම්පූර්ණ ජයග්රහණයක් ඉලක්ක කර ගනිමින් ඔහු කටයුතු කරනු ඇති බවත් විශ්ලේෂකයන්ගේ මතයයි.
