ඉන්දියාව සහ ස්වීඩනය අතර පවතින ද්විපාර්ශ්වික සබඳතා “උපායමාර්ගික හවුල්කාරිත්වයක්” (Strategic Partnership) දක්වා ඉහළ නැංවීමට ඉන්දීය අග්රාමාත්ය නරේන්ද්ර මෝදි මහතා සමත්ව තිබේ. ඒ මහතා සිය දීර්ඝ විදෙස් සංචාරයේ එක් පියවරක් ලෙස දෙදින නිල සංචාරයක් සඳහා ස්වීඩනය වෙත පැමිණි අවස්ථාවේදී මෙම ප්රගතිය අත්කරගෙන ඇත. එහිදී ඉන්දීය අග්රාමාත්ය නරේන්ද්ර මෝදි මහතා සහ ස්වීඩන් අග්රාමාත්ය උල්ෆ් ක්රිස්ටර්සන් (Ulf Kristersson) මහතා අතර වෙළෙඳ, තාක්ෂණ, ආරක්ෂක ඇතුළු ප්රධාන ක්ෂේත්ර ගණනාවක් මුල් කරගනිමින් ඉතා සාර්ථක රාජ්ය තාන්ත්රික ද්විපාර්ශ්වික සාකච්ඡා පැවැත්විණි.
මෙම සංචාරයේදී ඉන්දීය අග්රාමාත්යවරයා වෙත ස්වීඩන් රජයෙන් සුවිශේෂී රාජ්ය ඇගයීමක් ද හිමි විය. දෙරට අතර සබඳතා ශක්තිමත් කිරීමට දැක්වූ සුවිශේෂී දායකත්වය සහ ඔහුගේ දූරදර්ශී නායකත්වය අගය කරමින් ස්වීඩනයේ ඉහළම ගෞරව සම්මානයක් වන ‘රෝයල් ඕඩර් ඔෆ් ද පෝලර් ස්ටාර්, ඩිග්රී කමාන්ඩර් ග්රෑන්ඩ් ක්රොස්’ (Royal Order of the Polar Star, Commander Grand Cross) සම්මානයෙන් අගමැති මෝදි මහතාව පිදුම් ලැබීය. දෙරටේ ඉහළ පෙළේ නියෝජිත පිරිස් අතර පැවැති සාකච්ඡාවලදී වෙළෙඳ හා ආයෝජන, හරිත බලශක්ති සංක්රමණය, අභ්යවකාශ තාක්ෂණය, ආරක්ෂක අංශ, සුළු හා මධ්ය පරිමාණ ව්යාපාර මෙන්ම දෙරටේ ජනතාව අතර සබඳතා තවදුරටත් ගැඹුරු කිරීම පිළිබඳව අවධානය යොමු විය. ඉකුත් 2025 වසර වන විට දෙරට අතර ද්විපාර්ශ්වික වෙළෙඳාම ඇමෙරිකානු ඩොලර් බිලියන 7.75ක් දක්වා වර්ධනය වී තිබීම විශේෂත්වයක් වන අතර, ඉදිරියේදී ඉන්දු-යුරෝපා සංගම් නිදහස් වෙළෙඳ ගිවිසුම (India-EU FTA) හරහා නව ආර්ථික අවස්ථා රැසක් උදාකර ගැනීමට ද නායකයෝ එකඟතාව පළ කළහ.
