ලෝකයේ ඉහළම සහ උසම කඳු මුදුන ලෙස සැලකෙන එවරස්ට් (Mount Everest) කන්ද නේපාල පාර්ශවයෙන් එකම දිනයක් තුළ තරණය කළ වැඩිම කඳු නඟින්නන් සංඛ්යාවේ නවතම වාර්තාවක් පිහිටුවීමට ඊයේ (20) බදාදා දින සමත්ව ඇති බව සංචාරක සහ කඳු නැඟීමේ නිලධාරීන් තහවුරු කරයි. ඒ අනුව මුහුදු මට්ටමේ සිට මීටර් 8,849ක් (අඩි 29,032ක්) උසැති මෙම දැවැන්ත කඳු මුදුන වෙත ඊයේ දිනයේදී පමණක් කඳු නඟින්නන් 274 දෙනෙකු සාර්ථකව ළඟා වී තිබේ.
නේපාලය සහ චීනයේ ටිබෙට් කලාපීය දේශසීමාව මධ්යයේ පිහිටා ඇති එවරස්ට් කන්ද දෙපාර්ශවයෙන්ම තරණය කළ හැකි වුව ද, මෙවර චීන බලධාරීන් විසින් කිසිදු තරණ බලපත්රයක් නිකුත් නොකිරීම හේතුවෙන් ටිබෙට් පාර්ශවයෙන් කඳු නැඟීමට කිසිවෙකුටත් අවස්ථාව ලැබී නොමැති බව සංචාරක සංවිධායකයෝ පවසති. නේපාල කඳු නැඟීමේ ක්රියාකරුවන්ගේ සංගමයේ (Expedition Operators Association of Nepal) ප්රධාන ලේකම් රිෂි භණ්ඩාරි (Rishi Bhandari) මහතා අද (21) බ්රහස්පතින්දා රොයිටර්ස් (Reuters) පුවත් සේවයට ප්රකාශ කළේ, මීට පෙර නේපාල පාර්ශවයෙන් එකම දිනකදී වාර්තා වූ වැඩිම තරණ සංඛ්යාව 223ක් වූ අතර එය 2019 මැයි 22 වැනිදා වාර්තා වී තිබූ බවයි.
ගිනස් ලෝක වාර්තා (Guinness World Records) පොතට අනුව එවරස්ට් කන්දේ දෙපාර්ශවයෙන්ම (නේපාලය සහ ටිබෙට්) එකම දිනකදී වැඩිම පිරිසක් මුදුනට ළඟා වූ සමස්ත වාර්තාව සටහන්ව ඇත්තේ 2019 මැයි 23 වැනිදා වන අතර එදින කඳු නඟින්නන් 354 දෙනෙකු මුදුනට ළඟා වී තිබිණි. කෙසේ වෙතත්, නේපාල සීමාවෙන් පමණක් එකම දිනකදී වාර්තා වූ ඉහළම අගය මෙය වන බවත්, කඳු මුදුන තරණය කළ ඇතැම් පිරිස් තවමත් සිය සාර්ථකත්වය පිළිබඳව කඳවුරු (Base camp) වෙත නිල වශයෙන් දැනුම් දී නොමැති බැවින් මෙම 274ක අගය ඉදිරියේදී තවදුරටත් ඉහළ යා හැකි බවත් රිෂි භණ්ඩාරි මහතා වැඩිදුරටත් සඳහන් කළේය.
