ලොව ප්රකට SpaceX සමාගම සිය මූලික මහජන කොටස් නිකුතුව (IPO) සඳහා සූදානම් වෙමින් ඇමරිකානු සුරැකුම්පත් සහ විනිමය කොමිෂන් සභාව (SEC) වෙත ඉදිරිපත් කළ නිල ලේඛන මඟින්, ඉලොන් මස්ක්ට අයත් xAI සමාගමේ ‘Grok’ චැට්බොට් (Chatbot) හි පවතින NSFW (Not Safe For Work) හෙවත් වැඩිහිටියන්ට පමණක් සුදුසු විශේෂාංගය සිය ව්යාපාරයට දැඩි අවදානමක් සහ කීර්තිනාමයට හානියක් විය හැකි බව නිල වශයෙන් පිළිගෙන තිබේ. SpaceX සමාගම විසින් xAI සමාගම අත්පත් කරගෙන මාස 3ක් වැනි කෙටි කාලයකින් පසු මෙම හෙළිදරව්ව සිදුකර ඇත.
SpaceX සමාගම සිය ලේඛනවල පෙන්වා දෙන්නේ, Grok සතු NSFW මාදිලිය අනෙකුත් සාමාන්ය AI සේවාවලට වඩා ඉතා රළු සහ ප්රචණ්ඩකාරී ස්වභාවයක් ගන්නා බවයි. මෙමඟින් අසභ්ය දර්ශන, පුද්ගල කැමැත්තෙන් තොරව නිර්මාණය කරන ලිංගික රූප (Non-consensual sexual images) හෝ බුද්ධිමය දේපළ අයිතීන් උල්ලංඝනය වන අන්තර්ගතයන් බිහිවීමේ දැඩි ප්රවණතාවක් පවතින බව සමාගම ලේඛනගත කර තිබේ. මේ හේතුවෙන් සමාජීය ආන්දෝලනයන් සහ දැඩි නීතිමය පීඩනයන් එල්ල විය හැකි බවට SpaceX අනතුරු අඟවයි.
මේ වන විටත් ඇමරිකාව තුළ බාලවයස්කාරයන් සම්බන්ධ ලිංගික රූප සහ නිරුවත් දර්ශන නිර්මාණය කිරීමට මෙම AI මෙවලම භාවිත කළේ යැයි යන චෝදනාව මත පරීක්ෂණ ක්රියාත්මක වන අතර, Grok හි රූප සංස්කරණ විශේෂාංගය හේතුවෙන් සමාගමට එරෙහිව නඩු කිහිපයක් ද ගොනුකර ඇත. මීට අමතරව, යුරෝපා සංගමයේ පරිශීලක දත්ත සහ දරුවන්ගේ පෞද්ගලික තොරතුරු භාවිත කිරීම සම්බන්ධයෙන් අයර්ලන්ත දත්ත ආරක්ෂණ කොමිසම (DPC) සහ ඇමරිකානු ෆෙඩරල් වෙළඳ කොමිසම (FTC) විසින් ද xAI සමාගමට එරෙහිව පුළුල් විමර්ශන අරඹා තිබේ. මෙම අවදානම් පිළිගන්නා අතරම, OpenAI සහ Google වැනි දැවැන්තයන් සමඟ තරඟ කරමින් Grok ලොව වේගයෙන්ම දියුණු වන AI මෙවලමක් බව ද SpaceX සමාගම සිය වාර්තාවේ වැඩිදුරටත් සඳහන් කරයි.
